İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 558 Hüküm no: 608 Orijinal metin no: [173a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Yusuf’un boşandığı kocası Veli Beşe b. Ahmed’in zimmetini ibrâ ettiği Mahmiye-i İstanbul’da Molla Şeref mahallesinde sâkine olup zâtı ma‘rifet-i şer‘iyye ile ârifân Sâlih Çelebi b. Mehmed ve el-Hâc Hasan b. Ali nâm kimesneler ta‘rîfleri ile mu‘arrefe olan Emine bt. Yusuf nâm hâtun meclis-i şer‘-i şerîfde zevc-i mutallıkı bâ‘is-i hâze’l-kitâb Veli Beşe b. Ahmed nâm kimesne mahzarında üzerine da‘vâ ve takrîr-i kelâm edip cihet-i karz-ı şer‘îden mezbûr Veli Beşe zimmetinde bir def‘a on yedi guruş ve bir def‘a beş esedî guruş min haysi’l-mecmû‘ merkūm Veli Beşe zimmetinde yirmi iki guruş hakkım olup hâlâ suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Veli Beşe’ye müdde‘iye-i mezbûre Emine’den meblağ-ı mezbûru yirmi iki guruş ber vech-i muharrer iktirâz ve kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iye-i mezbûre bilâ-beyyine ber vech-i muharrer mu‘ârazadan men‘ olundukdan sonra yine mezbûre Emine meclis-i şer‘de mezbûr Veli Beşe mahzarında ikrâr-ı tâm ve takrîr-i kelâm edip zevcim mezbûr Veli Beşe zimmetinde mütekarrir ve ma‘kūdun-aleyh mehr-i müeccelim olan altı yüz akçe ve bi’t-terâzi bana farz ve takdîr olunan nafaka-i iddet-i ma‘lûmem için beş yüz akçe, min haysi’l-mecmû‘ hakkım olan bin yüz akçeyi mezbûr Veli Beşe yedinden tamâmen ahz u kabz eyledim ve yine mezbûr Veli Beşe bana def‘ ve teslîm ben dahi yedinden ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ali Beşe b. Hüseyin el-Mübâşir, Hüseyin Çelebi b. Receb, İbrahim Çelebi b. Ahmed, Mehmed Beşe b. Yusuf, Şâhin Ağa b. Abdullah, Ebûbekir b. Hüseyin ve gayruhüm mine’l-hâzırîn.