İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 558 Hüküm no: 609 Orijinal metin no: [173b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yazıcı Mustafa Çelebi b. Mehmed’in vârislerinin alacaklı oldukları Parım’ın zimmetini ibrâ ettikleri Husûs-ı âti’l-beyânın mahallinde tahrîr için bi’t-taleb savb-ı şer‘-i şerîfden irsâl Mevlânâ Abdurrahman Efendi b. Hüseyin mahmiye-i İstanbul’da hâlâ çavuşbaşı olan umdetü’l-emâsil ve’l-a‘yân Murad Ağa b. Hüseyin’in mahmiye-i mezbûrede Nevbethâne mahallesinde sâkin olduğu menzile varıp zeyl-i vesîkada mastûrü’l-esâmî olan müslimîn huzûrunda akd-i meclis-i şer‘-i şerîf eyledikde mahalle-i mezbûre kurbunda Elvanzâde mahallesinde sâkin iken bundan akdem vefât eden Yazıcı demekle ma‘rûf Mustafa Çelebi b. Mehmed nâm kimesnenin verâseti vâlidesi Emine bt. Mehmed nâm hâtun ile li ebeveyn er karındaşı Mehmed nâm şâbb-ı emrede münhasıra olduğu şer‘an sâbit oldukdan sonra mezbûre Emine tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sâkinlerinden Ali b. Mahmud ve Halil b. Ali nâm kimesneler şehâdetleri ile şer‘an sâbit olan Zülfikār Bey b. Abdi nâm [kimesne] vekâleten ve mezbûr Mehmed asâleten meclis-i şer‘-i şerîfde tüccârdan olup Şefteoğlu demekle ma‘rûf bâ‘is-i hâze’l-kitâb Parım? nâm zimmî muvâcehesinde her biri ikrâr ve takrîr-i kelâm edip müteveffâ-yı mezbûr hayâtında medîne-i Bursa’da iki bin iki yüz elli esedî guruşunu mezbûr Parım’a bi tarîki’l-karz def‘ ve teslîm ol dahi ahz u kabz ettiğinden sonra meblağ-ı mezbûrun iki yüz elli guruşunu müteveffâ-yı mezbûr hayâtında edâ ve teslîm ol dahi ahz u kabz edip iki bin guruşunu kable’l-ahz mezbûr Mustafa Çelebi fevt olup meblağ-ı mezbûr merkūm Parım zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şifâhî ve’t-tahkīki’l-vicâhî husûs-ı mezbûr Mevlânâ-yı merkūm mahallinde tahrîr ve ma‘an irsâl olunan Süleyman b. Mahmud ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-sâbi‘ ve’l-ışrîn min şehri Rebî‘ilâhir li sene seb‘a ve semânîn ve elf min hicreti men lehü’l-izzi ve’ş-şeref. Şuhûdü’l-hâl: Fahrü’l-müderrisînü’l-kirâm Ali Efendi sâkin-i mahalle-i mezbûre, Fahrü’l-akrân Şan Ağa b. Abdullah sâkin-i mahalle-i mezbûre, Ahmed Çavuş b. Ali sâkin-i Mesih Paşa, el-Hâc Hasan Ağa tâbi‘-i Osman Ağa, çavuşlar kethüdâsı Mehmed Çavuş b. Hüseyin, Kösec İbrahim Çavuş b. Abdullah, Arslan Çavuş b. Abdullah, es-Seyyid Hüseyin Çelebi tâbi‘-i Ahmed Ağa ve gayruhüm.