İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 560 Hüküm no: 611 Orijinal metin no: [174b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahbaz bt. Abdullah’ın ölen Abdülkadir Beşe’den çocuğu olduğunun ve hürriyetini kazandığının tescili Mahmiye-i İstanbul’da Debbâğ Yunus mahallesinde sâkine olup rıkk-ı sâbıkı[nı] mu‘terife olan bâ‘isetü hâze’l-kitâb açık sarı kaşlı kara ala gözlü orta boylu Rûsiyyetü’l-asl Şahbaz bt. Abdullah meclis-e şer‘-i şerîfde mahalle-i mezbûrede sâkin iken bundan akdem vefât eden Abdülkādir Beşe b. Ömer’in zevce-i metrûkesi olup rakīk olmak üzre kendiye vâzı‘atü’l-yed olan Râbia bt. Abdullah nâm hâtun mahzarında üzerine da‘vâ ve takrîr-i kelâm edip ben müteveffâ-yı mezbûr Abdülkādir Beşe’nin hayâtında yedinde mülkü olup hattâ mezbûre Râbia ben müteveffâ-yı mezbûrun mülkü olduğumu ikrâr dahi ettiğinden sonra mezbûr Abdülkādir Beşe beni ve ihbâl ve da‘vet dahi edip firâşından? Havvâ nâm sagīre benden mütevellid olmağla ben ümm-i veledi olup ba‘dehu mezbûr Abdülkādir Beşe fevt olmağla ben harâir-i asliyye gibi hür olmuşken, merkūme Râbia kendi mülkü olup rakīk olmak üzre bana bi gayri hakkın vaz‘-ı yed eder suâl olunup üzerimden yed-i mubtılasının kasr ve izâlesine tenbîh ve sebîlim tahliyye olunmak matlûbumdur dedikde gıbbe’s-suâl ve’l-inkâr mevsûfe-i mezbûre Şahbaz’dan müdde‘âsını mübeyyine beyyine taleb olundukda udûl-ı ahrâr-ı ricâlden olup mahalle-i mezbûre sükkânından olan Mehmed Çelebi b. Ebûbekir ve Hamza Çelebi b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Râbia Hâtun zevci mezbûr Abdülkādir Beşe’nin hayâtında mevsûfe-i mezbûre ve ihbâl ve da‘vet edip firâşından Havvâ nâm sagīre mütevellid olmağla mevsûfe-i mezbûre Şahbaz mezbûr Abdülkādir Beşe’nin ümmü’l-veledi olup ba‘dehu mezbûr Abdülkādir Beşe fevt olmağla mevsûfe-i mezbûre Şahbaz sâir harâir-i asliyye gibi hür olmuşdur biz bu husûsa bu vech şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şâhidân-ı mezbûrân Mehmed Çelebi b. Ebûbekir ve Hamza Çelebi b. Mehmed’in keyfiyyet-i hâlleri meclis-i şer‘-i şerîfden ahâlî-i mahalle-i mezbûreden el-Hâc İsâ b. Mehmed ve Mustafa Beşe b. Ahmed ve Mehmed b. Şaban ve Müezzin Abdullah Çelebi b. Ali ve Mehmed b. Yusuf ve Mehmed b. Ali ve Halil b. Ahmed nâm kimesneden suâl olundukda şâhidân-ı mezbûrân için adl ve makbûlü’ş-şehâde olduklarını haber verdiklerinden sonra şehâdetleri makbûle olmağın [175a] mûcebince mevsûfe-i mezbûrenin ber vech-i muharrer hürriyetine ba‘de’l-hükm ve’l-kazâ yed-i mubtılasının kasr ve izâlesinde mezbûre Râbia’ya tenbîh olunup mevsûfe-i mezbûrenin sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Beşe b. Mehmed, Mehmed b. Şaban, Mehmed Beşe b. el-Hâc İsâ, el-Hâc İsmail Çelebi b. Mehmed, Receb Beşe b. Ali, Mehmed Beşe b. Ali, Mustafa Beşe b. Mehmed, Haydar Beşe b. Ali, Mehmed b. İsmail, Mehmed Beşe b. Yusuf ve gayruhüm.