İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 562 Hüküm no: 612 Orijinal metin no: [175a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nefise bt. Durak’ın ölen kocası Bayram Ağa b. Cafer’in terekesindeki hissesini aldığı Mahmiye-i İstanbul’da Oruc Gāzi mahallesi ahâlîsinden olup bundan akdem vilâyet-i Anadolu’da İznikmid kazâsına tâbi‘ Söğütlü nâm karyede misâfiren vefât eden Bayram Ağa b. Cafer’in verâseti, zevce-i metrûkesi Nefise bt. Durak nâm hâtun ile sulbiye kızı Fâtıma’ya ve mezbûr Cafer’in babasının li ebeveyn er karındaşı Timur’un âhar diyârda sâkin sulbî kebîr oğlu Ali Ağa nâm kimesneye münhasıra olduğu şer‘an mütehakkik oldukdan sonra mezbûre Nefise Hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hacı Ömer Ağa b. Mehmed ve Hasan Ağa b. Ahmed nâm kimesne şehâdetleri ile şer‘an sâbit olan Hüseyin Bey b. Abdülcelîl nâm kimesne meclis-i şer‘-i şerîfde mezbûre Fâtıma’nın sâbıkan zevci ve hâl-i sıgārında kıbel-i şer‘den mansûb vasîsi olmağla tereke-i müteveffâ-yı mezbûra vâzı‘ü’l-yed olup Dergâh-ı âlî yeniçeri[ler]inin on dokuzuncu cemâ‘ati oda çorbacısı bâ‘is-i hâze’l-kitâb Halil Ağa b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Nefise Hâtun mezbûr Halil Ağa’nın yedinde olan iki kıt‘a defter-i kassâm nâtık olduğu üzre mûrisi müteveffâ-yı mezbûr Bayram Ağa’nın muhallefâtından bi’l-irsi’ş-şer‘î kendiye isâbet eden cem‘an yirmi sekiz bin beş yüz otuz yedi akçenin on sekiz bin üç yüz on dört akçesiyle yirmi bin akçe mehr-i müeccelini mezbûr Halil Ağa yedinden mukaddemâ ahz u kabz edip on bin iki yüz yirmi üç akçe mezbûr Halil Ağa yedinden bâkī kalmışdı? hâlâ meblağ-ı bâkī-i mezbûr on bin iki yüz yirmi üç akçeyi vekâlet-i mahkiyem hasebiyle mezbûr Halil Ağa yedinden tamâmen ahz u kabz eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Ömer Ağa b. Mehmed, Halil Çavuş b. Hüseyin Serbölük, Hasan Ağa b. Ahmed Murtaza Bey b. Ahmed, Mustafa Beşe b. ( ) el-Mübâşir, Ahmed Ağa b. Mustafa ve gayruhüm.