İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 562 Hüküm no: 613 Orijinal metin no: [175b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reis Todori v. Preşkova’nın Mısır’dan getirdiği pirinç yükü ile ilgili alacağı konusunda Nasrullah v. Fazlullah aleyhine açtığı davada iddiasını ispat edemediği Örf-i mellâhînde şayka ta‘bîr olunur sefîne-i kebîrenin reisi olan Todor[i] v. Preşkova nâm zimmî meclis-i şer‘-i hatîr-i lâzımü’t-tevkīrde Mısr-ı Kahire tüccârından işbu râfi‘ü’r-rakīm Nasrullah v. Fazlullah nâm zimmî muvâcehesinde üzerine da‘vâ ve takrîr-i kelâm edip merkūm Nasrullah Mısr-ı Kahire’de Dimyad nâm iskelede mahmiye-i İstanbul’da sefîne ile nakl için her yüz erdeb pirince üç yüz otuz beş esedî guruş ücret Todori Reis seferine vermek üzre sâlifü’z-zikr iskeleden sefîne-i mezbûreme bin yedi yüz kırk iki buçuk esedî guruş ücret ile beş yüz yirmi erdeb pirinci tahmîl edip ve sefîne-i mezbûre ile mahmiye-i İstanbul’a geldiğimizde zikr olunan beş yüz yirmi erdeb pirinci sefîne-i mezkûrumdan ihrâc ve kendi yedine tamâmen teslîm ve ücret-i mezbûre bin yedi yüz kırk iki buçuk esedî guruşun merkūm Nasrullah yedinden bin altı yüz otuz buçuk esedî guruşun ahz edip bâkī yüz dört esedî guruş kalmağla hâlâ taleb eylediğimden edâdan imtinâ‘ eder suâl olunup alıverilmek matlûbumdur dedikde gıbbe’s-suâl merkūm Nasrullah cevâbında fi’l-hakīka müdde‘î-i mezbûrun sefînesine mahalle-i mezkûrdan vech-i muharrer üzre beş yüz yirmi erdeb pirinç tahmîl ve mahmiye-i İstanbul’a getirdiğin ikrâr, lâkin beher erdeb pirince üç yüz on beşer esedî guruş ücret vermek üzre mu‘âkade ve hesâb-ı mezbûr üzre kabzını mu‘terif olduğu ücret-i mezkûre bin altı yüz otuz dokuz buçuk esedî guruş müdde‘î-i mezbûra edâ eyledim deyip her yüz erdeb pirinci üç yüz otuz beşer guruş Todori Reis seferine ücret ile mu‘âkadesini inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine[den] izhâr-ı acz ile isre’l-istihbâr, fi’l-hakīka müdde‘î-i mezbûrun sefînesine tahmîl eylediği beş yüz yirmi erdeb pirincin her yüz erdebine üç yüz otuz beş esedî guruş ücret Todori Reis seferine vermek üzre müdde‘î-i mezbûr ile mu‘âkade etmeyip ve hâlâ ol vechile ücret-i mezbûreden müdde‘î-i mezbûre zimmetinde reddi vâcib yüz dört esedî guruş dahi deyni bâkī kalmadığına mersûm Nasrullah’a yemîn teklîf olundukda ol dahi hasbe’l-mes’ûl yemîn billâhi’llezî enzelellahu İncîl’e alâ İsâ -aleyhi’s-selâm-etmeğin mûcebince müdde‘î-i mezbûr Todori bilâ-beyyine ziyâde da‘vâsından men‘ birle, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Mustafa Bey b. ( ) Serbölük, İbrahim Çelebi b. ( ) Serbölük, İsmail b. Mahmud, Mustafa Efendi el-Kâtib ve gayruhüm.