İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 563 Hüküm no: 614 Orijinal metin no: [176a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Satı Beşe b. Süleyman’ın evini İsmail Efendi b. İbrahim’e aldığı borç karşılığı rehin koyduğu (bey‘ bi’l-vefâ) Husûs-ı âti’l-beyânın mahallinde tahrîr için bi’l-iltimâs savb-ı şer‘-i şerîf-i enverden Mevlânâ es-Seyyid Muharrem b. İsmail irsâl [olunup] ol dahi mahmiye-i İstanbul’da Akşemseddin mahallesinde sâkin umdetü’l-müderrisînü’l-kirâm İsmail Efendi b. el-merhûm İbrahim Efendi’nin menziline varıp zeyl-i vesîka[da] muharrerü’l-esâmî olan müslimîn huzûrunda akd-i meclis-i şer‘-i kavîm eyledikde mahalle-i mezbûre sâkinlerinden Satı Beşe b. Süleyman nâm kimesne meclis-i ma‘kūd-ı mezbûrda müşârün-ileyh İsmail Efendi mahzarında bi tav‘ihî ikrâr-ı tâm ve takrîr-i kelâm edip akd-i âtî sudûruna değin yedimde mülküm olup mahalle-i mezbûrede vâki‘ iki tarafdan müşârün-ileyh İsmail Efendi mülkü ve bir tarafdan ba‘zan Bektaş Beşe ve ba‘zan ( ) nâm hâtun mülkleri ve bir tarafdan tarîk-i âm ile mahdûd olup büyût-ı adîdeyi müştemil menzilimi, bi cümleti’t-tevâbi‘ ve’l-levâhık müşârün-ileyh İsmail Efendi’ye bi tarîki’l-bey‘ bi’l-vefâ iki yüz guruşa bey‘ ve teslîm ol dahi ber vech-i muharrer iştirâ ettiğinden sonra semeni olan meblağ-ı mezbûr iki yüz guruşu müşârün-ileyh İsmail Efendi yedinden bi safkatin vâhidetin iştirâ ve kabz eylediğim bir yeşil çukaya kaplı samur paçası kürk ve beş zirâ‘ şalî Londrine çuka ve beş zirâ‘ Mısır moru Londrine çuka ve bir çift kırmızı ve altunî kadife Bursa yastığı ve bir çift kırmızı sâde kadife Bursa yastığı ve bir çift mor sâde kadife Bursa yastığı semenlerinden yüz esedî guruş ve iktirâz ve kabz eylediğim yüz esedî guruş cem‘an zimmetimde hakkı olan iki yüz esedî guruşa takās, ben dahi mukāssa ve kabûl ettiğimden sonra târih-i kitâbdan bir sene tamâmına değin edâ-i deyn ile fesh-i akde ta‘ahhüd eyledim dedikde gıbbe’t-tasdîki’ş-şer‘î yine mezbûr Satı meclis-i ma‘kūd-ı mezbûrda umdetü’l-eimmeti’l-kirâm Mehmed Efendi b. Abdurrahman mahzarında takrîr-i kelâm ve ta‘bîr ani’l-merâm edip eğer müddet-i mezbûre tamâmında edâ-i deyn müyesser olmazsa menzil-i mahdûd-ı mezbûru semen-i misli ile âhara bey‘ ve kabz-ı semene ve semeninden deyn-i mezbûru müşârün-ileyh İsmail Efendi’ye edâya fazlasını bana îsâle bey‘ ve kabz ve îsâl mütevakkıf olduğu umûrun küllîsine tarafımdan merkūm Mehmed Efendi’yi küllemâ azeltüke fe-ente vekîli mazmûnu üzre azil ve in‘izâlden mazmûne vekâlet-i devriyye ile vekîl ve nâib-i menâb nasb ve ta‘yîn eyledim, ol dahi vekâlet-i mezbûreyi kabûl ve merâsimini edâya müte‘ahhid oldu dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Ömer b. Osman ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Hasan Efendi b. Sun[ullah] eş-şehîr be Harâmî, Halil Beşe b. Osman, Yusuf Beşe b. Mustafa, Hüseyin Beşe b. Receb. Ahmed Çelebi b. Mehmed, Hasan Beşe b. Abdullah, Ömer Çavuş b. Zülfikār ve gayruhüm mine’l-hâzırîn.