İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 565 Hüküm no: 616 Orijinal metin no: [176b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah ile Mehmed Beşe b. İbrahim’in muhâla‘a yoluyla boşandıkları Mahmiye-i İstanbul hısnı ebvâbından Silivri kapısı dâhilinde Bâli Ağa mahallesi sâkinelerinden olup zâtı Mehmed b. Mustafa ve el-Hâc Mustafa b. Mehmed nâm kimesne ta‘rîfleriyle mu‘arrefe olan Sâliha bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Mehmed Beşe b. İbrahim nâm kimesne mahzarında ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Mehmed Beşe ile muhâla‘a-i sahîha-i şer‘iyye ile muhâla‘a edip ol dahi hul‘-i mezbûru kabûl eylediğinden sonra kendi mesârifine harc etmek için altmış beş dirhem bir sîm ön kuşağımı ve kendiye karz verdiğim on iki esedî guruş da‘vâsına müte‘allika ve hukūk-ı zevciyyete müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Mahmud Çelebi b. İsmail, Osman Beşe b. Ömer, Mehmed b. Mehmed, Mehmed Çelebi kethüdâ-yı muhzırân, Bekir Çelebi b. Hüseyin, Hasan Çelebi el-Muhzır ve gayruhüm.