İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 565 Hüküm no: 617 Orijinal metin no: [176b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mehmed’in ağdacı ve sirkeciler kethüdâlığına tayini Dârü’l-hilâfeti’l-aliyye Kostantıniyye el-mahmiye’de vâki‘ ağdacı ve sirkeci tâ’ifesinin ihtiyârlarından Mehmed b. Muharrem ve Ahmed b. Yakub ve Mustafa Beşe b. Osman ve Mehmed b. Receb ve İbrahim b. Şaban ve İvaz b. Mehmed ve Hüseyin b. Mehmed ve el-Hâc Mahmud b. Ahmed ve Mustafa b. Mehmed ve Mehmed Tennurî nâm kimesneler meclis-i şer‘-i şerîf-i Nebevî ve mahfil-i dîn-i münîf-i Mustafavî’de, tâ’ife-i mezbûreden işbu râfi‘ü’l-kitâb zahrü’l-erbâb Ali Bey b. Mehmed nâm kimesne mahzarında her biri takrîr-i kelâm ve ta‘bîr ani’l-merâm edip bundan akdem intizâm-ı umûrumuz için kethüdâmız olan işbu hâzır bi’l-meclis Beşe b. Ahmed nâm kimesne ihtiyârı ve hüsn-i rızâsıyla kethüdâlıkdan ferâğ ve kasr-ı yed etmekle intizâm-ı umûrumuz için üzerimize bir kethüdâ nasb ve ta‘yîn olunmak lâzım olup ve mezbûr Ali Bey umûr-dîde ve kâr-âzmûde olup her vechile kethüdâlık umûrunu ikāmete kādir olmağla taraf-ı şer‘den mezbûr Ali Bey üzerimize kethüdâ nasb ve ta‘yîn olunup vesîka tahrîr olunmak matlûbumuzdur dediklerinde mezbûrûnun ber vech-i muharrer iltimâslarına müsâ‘ade olunup taraf-ı şer‘den mezbûr Ali Bey tâ’ife-i mezbûre üzerine intizâm-ı umûrları için kethüdâ nasb ve ta‘yîn olundukda ol dahi kabûl ve hizmet-i lâzımesini edâya müte‘ahhid olmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi [b.] Mehmed Serbölük, Hasan Çelebi b. Abdülmennân el-Muhzır, Osman Çelebi b. Ömer el-Muhzır, İbrahim Efendi ve gayruhüm.