İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 566 Hüküm no: 618 Orijinal metin no: [177a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Abdurrahman’ın Mustafa Paşa b. Oruc Ağa’ya borcu olduğu Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden irsâl olunan Mevlânâ Abdurrahman Efendi b. Hüseyin düstûr-ı ekrem müşîr-i efham nizâmü’l-âlem nâzım-ı menâzımü’l-ümem sa‘âdetlü Mustafa Paşa b. el-merhûm Oruc Ağa hazretlerinin mahmiye-i İstanbul’da Süleymaniye câmi‘-i şerîfi kurbunda vâki‘ saray-ı âlîlerine varıp zeyl-i vesîkada mastûrü’l-esâmî olan müslimîn huzûrunda akd-i meclis-i şer‘-i mübîn eyledikde Paşa-yı müşârün-ileyh hazretlerinin ev kethüdâları olan fahrü’l-a‘yân Ali Ağa b. Abdurrahman meclis-i ma‘kūd-ı merkūmda, Paşa-yı müşârün-ileyh hazretlerinin hâlâ kethüdâları ve taraf-ı bâhirü’ş-şereflerinden husûs-ı âti’l-beyâna vekîlleri olduğu etbâ‘ından İsmail Ağa b. Mehmed ve Hamza Ağa b. Hüseyin nâm kimesneler şehâdetleri ile şer‘an sâbit olan umdetü’l-emâcid ve’l-ekârim Ali Ağa b. Şükrullah mahzarında bi tav‘ihî ikrâr ve i‘tirâf edip Paşa-yı müşârün-ileyh hazretlerinin bundan akdem hıfz için yedimde olan malından on bir yük otuz üç bin dokuz yüz akçesi ile iki bin Şerîfî altını kendi mesârifime sarf ile istihlâk etmeğin hâlâ meblağayn-i mezbûreyn on bir yük otuz üç bin dokuz yüz akçe ile iki bin Şerîfî altın Paşa-yı müşârün-ileyh hazretlerine vâcibü’l-edâ ve lâzımü’l-kazâ deynimdir dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Abdurrahman Ağa b. Mehmed ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Kapıcılar kethüdâsı olan mefharü’l-a‘yân ve’l-eşbâh Süleyman Ağa b. Davud, eş-Şeyh Mustafa Efendi b. Ahmed, fahrü’l-a‘yân kazzâz Hasan Ağa b. Mehmed, zahrü’l-akrân Gürcü Osman Ağa b. Abdullah, fahrü’l-akrân İbrahim Ağa b. Abdullah, zahrü’l-a‘yân Ömer Ağa b. Ebûbekir, fahrü’l-eşbâh Mehmed Ağa b. Mehmed, fahrü’l-akrân Ahmed Efendi b. el-Hâc Muslu.