İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 567 Hüküm no: 619 Orijinal metin no: [177a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Abdurrahman’ın Mustafa Paşa b. Oruc Ağa’ya olan borcuna karşılık köşkünü ve arsasını takas ettiği Min hattıhî Husûs-ı âti’l-beyânın mahallinde tahrîri için bi’l-iltimâs savb-ı şer‘-i şerîfden irsâl olunan Mevlânâ Abdurrahman Efendi b. Hüseyin düstûr-ı ekrem müşîr-i efham nizâmü’l-âlem nâzım-ı menâzımü’l-ümem sa‘âdetlü Mustafa Paşa b. el-merhûm Oruc Ağa hazretlerinin mahmiye-i İstanbul’da Süleymaniye câmi‘-i şerîfi kurbunda vâki‘ saray-ı âlîlerine varıp zeyl-i sahîfede muharrerü’l-esâmî olan müslimîn huzûrunda akd-i meclis-i şer‘-i mübîn eyledikde Paşa-yı müşârün-ileyh hazretlerinin [177b] ev kethüdâları olan fahrü’l-eşbâh Ali Ağa b. Abdurrahman meclis-i ma‘kūd-ı merkūmda işbu kitâb-ı müstetâb-ı eyâdî-i kerîmeleri ile şeref-yâb olan Paşa-yı müşârün-ileyh hazretlerinin kethüdâları ve taraf-ı bâhirü’ş-şereflerinden husûs-ı âti’l-beyâna vekîlleri olduğu etbâ‘ından İsmail Ağa b. Mehmed ve Hamza Ağa b. Hüseyin nâm kimesneler şehâdetleri ile şer‘an sâbit olan umdetü’l-emâcid ve’l-ekârim Ali Ağa b. Şükrullah mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Kırkçeşme kurbunda sekbanbaşı İbrahim Ağa mahallesinde vâki‘ bir tarafdan Eğlence bt. Abdullah nâm hâtun ve bir tarafdan Hekimzâde kızları Hatice ve Sâliha hâtunlar mülkleri ve bir tarafdan ba‘zan Harameyn-i Şerîfeyn vakfı ve ba‘zan Mehmed Efendi veresesi mülkü ve ba‘zan el-Hâc Süleyman mülkü ve bir tarafdan tarîk-i âm ile mahdûd, hâriciyyesinde tabaka-i ulyâda üç bâb oda ve bir sofa ve vustâda dört bâb oda ve dehliz ve süflîde bir bâb oda ve bir ahır ve kanavât-ı müsennât ile masura su cârî olur bir musluk ve arsası bin sekiz yüz otuz altı zirâ‘ zât-ı eşcâr iki köşk ve iki bi’r-i mâ ve bir matbahı muhtevî bahçe ve dâhiliyyesinde ulyâda iki bâb oda ve bir sofa ve bir kahve odası ve vustâda üç bâb oda ve bir dehliz ve süflîde bir matbah ve bir su mahzeni ve bir hamam ve fevkānî ve tahtânî iki mahzen ve cüneyneyi müştemil menzilimi, bi cümleti’t-tevâbi‘ ve’l-levâhık vekîl-i mûmâ-ileyh Ali Ağa’ya tarafeynden îcâb ve kabûlü hâvî bey‘-i kat‘î ile on bir yük yirmi üç bin dokuz yüz akçeye bey‘ ve teslîm ve mârrü’z-zikr bahçeye muttasıl olup merhûme Bülbül Hâtun vakfından icâreteyn-i ma‘lûmeteyn ile taht-ı tasarrufumda olan yüz altmış zirâ‘ hadîka arsasını on bin akçe bedel mukābelesinde mütevellîsi izniyle ferâğ ve tefvîz ol dahi Paşa-yı müşârün-ileyh hazretleri için mülkü iştirâ ve tesellüm ve kabz ve tefevvüz ve kabûl ettiğinden sonra semen-i mezbûr on bir yük yirmi üç bin dokuz yüz akçe ve bedel-i mezkûr on bin akçe cem‘an on bir yük otuz üç bin dokuz yüz akçeye takās ben dahi mukāssa ve kabûl eyledim ba‘de’l-yevm menzil-i mahdûd-ı mezkûr Paşa-yı müşârün-ileyh hazretlerinin mülk-i müşterâsı olup ve merhûme Bülbül Hâtun vakfından olan hadîka arsası hakk-ı müfevvezi olmuşdur dedikde gıbbe’t-tasdîki’ş-şer‘î husûs-ı mezkûru Mevlânâ-yı mezbûr mahallinde tahrîr ve ma‘an irsâl olunan Abdurrahman b. Mehmed ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Kapıcılar kethüdâsı olan mefharü’l-a‘yân ve’l-eşbâh Süleyman Ağa b. Davud, eş-Şeyh Mustafa Efendi b. Ahmed, fahrü’l-a‘yân kazzâz Hasan Ağa b. Mehmed, zahrü’l-akrân Gürcü Osman [Ağa b.] Abdullah, fahrü’l-akrân İbrahim Ağa b. Abdullah, zahrü’l-a‘yân Ömer Ağa b. Ebûbekir, fahrü’l-eşbâh Mahmud Ağa b. Mehmed, fahrü’l-akrân Ahmed Efendi b. el-Hâc Muslu ve gayruhüm mine’l-hâzırîn.