İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 568 Hüküm no: 620 Orijinal metin no: [178a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Hurrem’in borç karşılığında Osman b. Abdullah’a rehin verdiği evini borcunu ödemekle geri aldığı Mahmiye-i İstanbul’da Koca Mustafa Paşa kurbunda Ali Fakīh mahallesinde sâkin Dergâh-ı âlî yeniçerilerinden kırk dokuzuncu bölüğe mahsûs oda yoldaşlarından Hasan Ağa b. Hurrem nâm kimesne meclis-i şer‘-i şerîfde bâ‘is-i hâze’l-kitâb Receb b. Veli nâm kimesne mahzarında ikrâr ve takrîr-i kelâm edip bundan akdem gāib ani’l-meclis Osman b. Abdullah nâm kimesneye yetmiş esedî guruşumu idâne ve teslîm ol dahi istidâne ve tesellüm ve meblağ-ı mezbûr yetmiş beş esedî guruş mukābelesinde mahalle-i mezbûrede vâki‘ beyne’l-ahâlî ve’l-cîrân ma‘lûmü’l-hudûd menzilini bana rehin vaz‘ ve teslîm ben dahi irtihân ve tesellüm ettiğimden sonra meblağ-ı mezbûr yetmiş beş esedî guruş ahz u kabz ve bana teslîm ve fekk-i rehine tarafımdan mezbûr Receb’i vekîl ve menâbıma nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd ettiğinden sonra mezbûr Receb vekâlet-i mahkiyesi hasebiyle meblağ-ı mezbûr yetmiş beş esedî guruşu mezbûr Osman yedinden bi’l-vekâle ahz u kabz ve fekk-i rehin edip menzil-i mahdûd-ı mezkûru yine mezbûr Osman’a bi’l-vekâle teslîm ol dahi ahz u kabz ettiğinden sonra mezbûr Osman yedinden ber vech-i muharrer makbûz olan meblağ-ı mezbûr yetmiş beş esedî guruşu mezbûr Receb’in zimmetinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’s-sânî aşer min şehri Cemâziyelevvel li sene seb‘a ve semânîn ve elf. Şuhûdü’l-hâl: Mehmed Çelebi b. Ali Beşe serbölük-i 49. bölük, Mustafa b. Timur seroda, Mehmed b. Osman, Hasan Beşe b. Abdi, Mehmed b. Mehmed 49. bölük, Nuh Çelebi seroda-i 50. [bölü]k, Hasan Beşe b. ( ) ve gayruhüm.