İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 570 Hüküm no: 622 Orijinal metin no: [178b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdülcelil’in rüşvet davasında nâib Mehmed Efendi ile sulh oldukları Mahmiye-i İstanbul’da ( ) mahallesi sâkinlerinden olup târih-i kitâbdan üç sene mukaddem medîne-i Gelibolu müzâfâtından Anafarta-i kebîr voyvodası olan Abdülcelîl Bey b. el-merhûm Hüseyin Paşa’nın oğlu ve tarafından husûs-ı âti’l-beyâna vekîl olduğu etbâ‘ından İvaz b. Abdullah ve Mehmed Çavuş b. Hamza nâm kimesneler şehâdetleri ile şer‘an sâbit olan Mustafa Bey nâm kimesne meclis-i şer‘-i şerîfde târih-i mezbûrda medîne-i mezbûrede nâibü’ş-şer‘ olan fahrü’l-müderrisîn bâ‘is-i hâze’l-kitâb Mehmed Efendi nâm kimesne tarafından husûs-ı âti’z-zikre vekîl olduğu nehc-i şer‘î üzre sâbit olan Abdurrahman Çelebi b. Hasan mahzarında ikrâr ve takrîr-i kelâm edip müvekkilim merkūm Abdülcelîl Bey târih-i mezbûrda medîne-i mezbûrede bir abd-ı âbık husûsu için yirmi beş guruş ve ba‘zı husûs için dahi on beş guruşu bi tarîki’r-rüşvet merkūm Mehmed Efendi’ye def‘ ve teslîm ol dahi ahz etmekle bundan akdem meblağayn-i mezbûreyn cem‘an kırk guruşu müvekkilim merkūm Abdülcelîl Bey merkūm Mehmed Efendi’den taleb ve da‘vâ ettikde, ol dahi bi’l-külliye inkâr etmeğin beynlerinde ba‘de’n-nizâ‘ muslihûn tavassut edip beynlerinde on esedî guruş üzerine inşâ-i akd-i sulh ettiklerinde müvekkilim merkūm Abdülcelîl Bey dahi sulh-ı mezbûru kabûl ve bedel-i sulh olan meblağ-ı mezbûr on guruşu mezbûr Mehmed Efendi yedinden tamâmen ahz u kabz ettiğinden sonra meblağ-ı mezbûr kırk guruşa müte‘allika da‘vâdan merkūm Mehmed Efendi’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ebûbekir b. Hüseyin, Ömer b. Osman, Mahmud b. İsmail ve gayruhüm.