İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 571 Hüküm no: 623 Orijinal metin no: [178b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Halil’in Hasan b. Selim’den muhâla‘a yoluyla boşandığı Mahmiye-i İstanbul’da Yenikapı kurbunda Hacı Mahmud mahallesi sâkinelerinden olup zâtı mahalle-i mezbûre sükkânından Yusuf Çelebi b. Abdullah ve Mehmed Çelebi b. Mustafa nâm kimesneler ta‘rîfleri ile mu‘arrefe olan Ayşe bt. Halil nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Hasan b. Selim nâm kimesne mahzarında ikrâr-ı tâm ve ta‘bîr ani’l-merâm edip zevcim mezbûr Hasan zimmetinde mütekarrir ve ma‘kūdun-aleyh olan beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Hasan ile muhâla‘a-i sahîha-i şer‘iyye ile muhâla‘a edip ol dahi hul‘-i mezbûru kabûl eylediğinden sonra hukūk-ı zevciyyete müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, İbrahim Çelebi b. Ahmed, Ebûbekir b. Hüseyin, Osman Çelebi b. el-Hâc Ömer ve gayruhüm mine’l-hâzırîn.