İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 573 Hüküm no: 625 Orijinal metin no: [179b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Efendi b. Hasan’ın kiraladığı arsayı Hânî Sultan Vakfı’na iadesi Husûs-ı âti’l-beyânın mahallinde istimâ‘ ve tahrîr için buyruldu-yı şerîf vârid olmağın imtisâlen-leh hâssa mimarlardan üstâd Mustafa Halîfe b. Ali ve üstâd Receb Halîfe b. Veli ile Abdurrahman Efendi b. Hasan nâm kimesnenin mahmiye-i İstanbul’da Debbâğzâde mahallesinde vâki‘ menzilinin hadîka-i âti’z-zikri üzerine varılıp, zeyl-i rakīmde isimleri terkīm olunan bî-garaz udûl-i müslimîn ve sikāt-ı muvahhidîn mahzarında akd-i meclis-i şer‘-i mübîn olundukda merhûme Hânî Sultan -aleyhi’r-rahmeti ve’l-gufrân-evkāfının bi’l-fi‘l mütevellîsi olan umdetü’l-meşâyihi’l-kirâm eş-Şeyh Ali Efendi b. Mustafa nâm kimesne meclis-i ma‘kūd-ı mezbûrda, merkūm Abdurrahman Efendi mahzarında bi’t-tevliyye takrîr-i da‘vâ ve tasvîr-i müdde‘â edip bir tarafdan merkūm Abdurrahman Efendi menzili ve bir tarafdan merhûme-i merkūme Hânî Sultan mu‘allimhânesi ve bir tarafdan ulemâdan bir recüle meşrûta vakıf menzil ve bir tarafdan ba‘zan Mehmed Efendi b. Veli Efendi ve ba‘zan Esedî Yusuf nâm kimesneler tasarruflarında olan menziller ile mahdûde olan işbu hadîka arsası müstagallât-ı evkāf-ı mezbûreden olmayıp, mu‘allimhâne-i mezkûrenin merâfıkından iken evkāf-ı mezkûreye mütevellî olanlardan biri bi gayr-ı vech-i şer‘î ancak senede üç yüz akçe ücret-i maktû‘a ile merkūm Abdurrahman Efendi’ye îcâr eylemeğin, merkūm Abdurrahman Efendi dahi verâsına tahta perde çekip menziline zam ve ilhâk eylemekle mu‘allimhâne-i mezkûrenin haylisi bir mikdâr münsed olmuşdur. Merkūm Abdurrahman üzerine suâl olunup hadîka-i mezkûre arsasından kasr-ı yedine tenbîh olunması bi’t-tevliyye matlûbumdur dedikde gıbbe’s-suâl merkūm Abdurrahman Efendi cevâbında kaziyye minvâl-i muharrer üzre olduğunu ikrâr ve lâkin işbu hadîka-i mesfûre arsasından ber vech-i mübeyyen mu‘allimhâne-i mezkûrenin merâfıkından olup icâre-i maktû‘a-i mezkûre ile taht-ı icâremde olan arsa tûlen ve arzen bi hesâb-ı terbî‘î yüz altmış zirâ‘ mikdârıdır deyip bâkīsi evkāf-ı mezkûreden olduğunu inkâr edicek mütevellî-i mezbûrdan hadîka-i mezkûre arsasının bâkīsi dahi evkāf-ı mezkûreden olduğuna beyyine taleb olundukda ityânı için istimhâl etmeğin mehl-i şer‘î ile imhâl olundukdan sonra mu‘allimhâne-i mezkûrenin merâfıkından olup müstagallât-ı evkāf-ı mezbûreden olmayan arsanın îcârı sahîh olmamağın alâ mûcebi ikrârihî hadîka-i mahdûde-i [180a] mezkûreden mu‘allimhâne-i mezbûre tarafında vâkı‘a bi hesâb-ı mezbûr yüz altmış zirâ‘ arsayı mütevellî-i mezbûr ile merkūm Abdurrahman Efendi muvâcehelerinde mimârân-ı mezbûrân ba‘de’l-mesâha ifrâz ve alâmât-ı fâsıla vaz‘ı ile mümtâz kıldıklarında icâre-i mezkûrenin adem-i sıhhatine binâen arsa-i müfreze-i mezkûreden kasr-ı yedine merkūm Abdurrahman Efendi’ye cânib-i şer‘[den] ba‘de’l-hükm ve’t-tenbîh, mâ hüve’l-vâki‘ bi’t-taleb ketb ve imlâ olundu. Fi’l-evâili şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdurrahman b. Hanefi el-İmâm, Hasan Efendi b. Mehmed el-Müezzin, Hamza Efendi b. Mehmed en-Nâzır, Abdullah Efendi b. Mustafa el-Kâtib, es-Seyyid İsmail Efendi b. ( ), diğer Şaban Efendi b. Memi, Muslihiddin Efendi b. Şaban, İbrahim Çelebi b. Ahmed, Mehmed Çelebi b. Mustafa, Mehmed Beşe b. Hasan, Hasan Çelebi b. Bayram el-Muhzır, Hasan Çavuş b. Abdüssettar, Şaban b. Hüseyin ve gayruhüm mine’l-hâzırîn.