İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 574 Hüküm no: 626 Orijinal metin no: [180a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Boyalı ham ipek bükücülerinin sekizden fazla tezgâh olmaması gerektiği üzerinde anlaştıkları Mahmiye-i İstanbul’da olan ham ipek bükücü tâ’ifesinden yamak olup düğmelik boyalı ipek bükücü yahudilerin yiğitbaşıları olan Zaharye v. Abraham ve ihtiyârlarından Bayram v. Sarya ve Bereket v. David ve David v. İsâ ve Yako v. Kemal ve Yasef v. David ve Arslan v. Mosi ve David v. Bereket ve dülger David v. Yakud ve Arslan v. Avarya ve Elyas v. Bereket ve İlya v. Yani ve Şebatyakob v. Kızati nâm yahudiler meclis-i şer‘-i enverde her biri takrîr-i kelâm ve ta‘bîr ani’l-merâm edip kadîmü’l-eyyâmdan beynimizde boyalı ipek bükenlerin sekiz destgâh ihdâs etmekle bizim kârımız kesâd verip beynimizde ihtilâle bâ‘is olmağın ba‘de’l-yevm sekizden ziyâde destgâh ihdâs etmeyip ve kadîmden olagelmişe muhâlefet etmemek üzre beynimizde kavl ü ittifâk ve ahd [ü] mîsâk eyledik, bu vech üzre takrîrimiz tahr[îr] olunup kıbel-i şer‘den yedimize hüccet verilmek matlûbumuzdur dediklerinde işbu vesîka-i enîka hıfzan li’l-makāl gıbbe’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim b. Ahmed, Osman Çelebi b. Ömer el-Muhzır, Mehmed Ağa kethüdâ-yı muhzırân ve gayruhüm mine’l-hâzırîn.