İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 575 Hüküm no: 627 Orijinal metin no: [180a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Halil’in evini Muslu Beşe b. İsmail’e sattığı Mahmiye-i İstanbul’da Keçeci Pîrî mahallesi sâkinlerinden Osman Beşe b. Halil nâm kimesne meclis-i şer‘-i şerîf-i enverde bâ‘is-i hâze’l-kitâb Muslu Beşe b. İsmail nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan hallâc Mustafa Beşe mülkü ve bir tarafdan Saraylı Hâtun mülkü ve bir tarafdan Mehmed Efendi bahçesi ve bir tarafdan tarîk-i âm ile mahdûd bir bâb tahtânî oda ve sofa ve sundurmalı ve bir kenîf ve havluyu müştemil menzilimi, cemî‘ tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile altmış esedî guruşa mezbûr Muslu Beşe’ye bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûr altmış esedî guruşu merkūm Muslu Beşe yedinden tamâmen ahz u kabz eyledim ba‘de’l-yevm menzil-i mahdûd-ı mezkûr merkūm Muslu Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene seb‘a ve semânîn ve elf. Şuhûdü’l-hâl: Mehmed Efendi b. Mustafa el-Müezzin. Hüseyin b. Mehmed, İbrahim b. Mehmed, Hüseyin Çelebi b. Hüseyin, Mustafa b. Ahmed, (…), Ahmed Çelebi b. Ali, İsmail Çelebi b. Muslu, Hüseyin b. Ahmed.