İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 577 Hüküm no: 629 Orijinal metin no: [181a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Veli’nin terk ettiği karısı Fâtıma ile oğlu Mustafa ve câriyesi Mülâyim’e nafaka takdiri Mahmiye-i İstanbul’da Ali Paşa-yı Atîk mahallesi sâkinlerinden es-Seyyid Veli b. ( ) nâm kimesne zevcesi Fâtıma bt. ( ) nâm hâtun-ı mezbûreden makbûle mahnûn[u] meflûc sulbî oğlu es-Seyyid Mustafa’yı ve Mülâyim nâm câriyesini bilâ-nafaka bırakıp âhar diyâra gidip, nafaka cinsinden bir nesne irsâl etmeyip ve nafakaya kemâl-i ihtiyâcları olduğu lede’ş-şer‘i’ş-şerîf müstahık ve mutazarrır olmağın mezbûre Fâtıma’nın talebi [181b] ile es-Seyyid Veli üzerine hâkim-i muvakki‘-i a‘le’l-kitâb tûbâ-leh hüsnü me’âb -refa‘a kadruhû’l-mevlâ’l-vehhâb-hazretleri mezbûre Fâtıma [ve] es-Seyyid Mustafa[’nın] her biri için yevmî beş akçe ve mezbûre Mülâyim için yevmî üç akçe farz ve takdîr edip meblağ-ı mezbûr cem‘an on üç akçeyi kendi nefsine ve oğlu mezbûrun ve merkūme Mülâyim’in nafaka ve kisvelerine sarfa ve vakt-i zarûretde istidâneye ve lede’z-zafer gāib-i mezbûr üzerine rücû‘a merkūme Fâtıma’ya izn-i sahîh-i şer‘î ile izin vermeğin, mâ vaka‘a bi’t-taleb ketb olundu. Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Osman b. Ahmed, Hasan b. Ramazan, İbrahim Çelebi b. Mehmed, Mehmed b. Mustafa, Ali b. Şaban ve gayruhüm.