İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 578 Hüküm no: 630 Orijinal metin no: [181b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülbûy bt. Hüseyin’in evini oğlu Mehmed Ağa’ya sattığı Mahmiye-i İstanbul’da Mimar Sinan mahallesinde sâkine Gülbûy Hâtun bt. Hüseyin nâm hâtun li ebeveyn karındaşı ve tarafından bey‘-i âti’l-beyâna ikrâreten vekîl olup zât-ı mezbûreyi ma‘rifet-i şer‘iyye ile ârifân olan Ali Ağa b. el-Hâc Mehmed ve Mustafa Ağa b. Mehmed nâm kimesne şehâdetleri ile şer‘an vekâleti sâbite olan Hasan Ağa b. Hüseyin mahfil-i şer‘de, kendinin sulbî oğlu işbu râfi‘ü’l-kitâb Mehmed Ağa nâm kimesne mahzarında ikrâr ve takrîr-i kelâm edip müvekkile-i mezbûre akd-i âtî sudûruna değin silk-i mülkünde münselik olup mahalle-i mezbûrede vâki‘ bir tarafdan el-Hâc İbrahim mülkü ve bir tarafdan Derviş Odabaşı nâm kimesne mülkü ve bir tarafdan ba‘zan hallâc Sefer ve ba‘zan Yusuf Paşa mülkleri ve taraf-ı râbi‘den tarîk-i âma müntehî fevkānî yedi bâb oda ve bir bâb sofa ve bir kenîfi ve tahtânî bir matbah ve bir bi’r-i mâ ve havluyu ve cüneyneyi müştemil mülk menzilini, tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşı oğlu mezbûr Mehmed Ağa’ya altı yüz elli esedî guruşa bey‘ ve teslîm eylediğinde ol dahi ba‘de’l-ibtiyâ‘ ve’t-tesellüm semeni olan meblağ-ı mezkûr altı yüz elli esedî guruşu yedinden tamâ[men] ahz u kabz eyledi ba‘de’l-yevm menzil-i mahdûd-ı mezbûr Mehmed Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i şehri Rebî‘ilâhir li sene seb‘a ve semânîn ve elf. Şuhûdü’l-hâl: Abdüllatîf Efendi b. Mehmed el-İmâm, Mehmed b. Abdüllatîf, el-Hâc Mehmed b. Ali, Mehmed Efendi b. Mehmed, Hasan Çelebi b. Hurrem, Mustafa Çelebi b. Mehmed, Seyyid Hüseyin b. Mehmed, İslâm Beşe b. Abdullah ve gayruhüm.