İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 579 Hüküm no: 631 Orijinal metin no: [181b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Muslu’nun boşandığı kocası Kasım b. Haydar’ın zimmetini ibrâ ettiğinin sabit olduğu Mahmiye-i İstanbul’da Çakır Ağa mahallesinde sâkine Emine bt. Muslu nâm hâtun meclis-i şer‘-i hatîr-i lâzımü’t-tevkīrde zevc-i mutallıkı işbu sâhibü’l-kitâb Kasım b. Haydar nâm kimesne mahzarında üzerine da‘vâ ve takrîr-i kelâm edip mezbûr Kasım zevcim olup târih-i kitâbdan üç sene mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan mehr-i müeccelim dört yüz akçe ile zevciyyet beynimizde kāim iken, bi tarîki’l-emâne yedine def‘ ve teslîm eylediğim bir tek altın bilezik ve bir tek incili altın küpe ve bir bütün kemer sîm kuşak ve bir al dârâyî zıbın ve bir süt mâîsi münakkaş kemha kaftanımın suâl olunup merkūm Kasım’dan alıverilmesi matlûbumdur dedikde gıbbe’s-suâl mezbûr Kasım cevâbında müdde‘iye-i mezbûrenin eşyâ-i mezkûresini ber vech-i muharrer ahz u kabz eylediğimden mâ‘adâ târih-i kitâbdan üç sene mukaddem müdde‘iye-i mezbûreyi ber vech-i muharrer tatlîk ettiğimde mehr-i müecceli olan meblağ-ı mezbûr dört yüz akçeyi müdde‘iye-i mezbûreye tamâmen edâ ve teslîm [182a] ol dahi yedimden ahz u kabz ettiğinden sonra hukūk-ı zevciyyete ve gayra müte‘allika âmme-i de‘âvî ve mütâlebâtdan zimmetim ibrâ-i âmm-ı kātı‘ü’n-nizâ‘ ile ibrâ ve iskāt etmiş idi deyû def‘le mukābele edicek isre’l-istintâk ve akībe’l-inkâr, evvelâ mezbûr Kasım’dan def‘-i mezbûrunu mübeyyine beyyine taleb olundukda udûl-i müslimînden olup mahalle-i mezbûre imâmı olan Yahya Efendi b. Mehmed ve Ebûbekir b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Kasım zevcesi mezbûre Emine’yi târih-i kitâbdan üç sene mukaddem tatlîk ettikde, zimmetinde mütekarrir ve ma‘kūdun-aleyh mehr-i müecceli olan meblağ-ı mezbûr dört yüz akçeyi merkūmeye bizim huzûrumuzda edâ ve teslîm mezbûre Emine dahi tamâmen ahz u kabz edip sâir hukūk-ı zevciyyete ve gayra müte‘allika cemî‘ de‘âvî ve mütâlebâtdan merkūm Kasım’ın zimmetini ibrâ-i âmm-ı kātı‘ü’n-nizâ‘ ile ibrâ ve iskāt etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle müdde‘iye-i mezbûre Emine Hâtun ber vech-i muharrer bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Ahmed Çelebi b. İbrahim an mahalleti mezbûre, Hüseyin b. Abdullah an mahalleti mezbûre, Mehmed Çelebi b. Ali der mahalle-i mezbûre, Sefer b. İslâm, İbrahim Çelebi b. Ahmed, Ebûbekir b. Hüseyin.