İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 582 Hüküm no: 634 Orijinal metin no: [183a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Akıl hastalığı belli olan Kiryaki bt. Bazar’ın nafakası için vasîsi tarafından evinin satışına izin verilmesi talebi Mahmiye-i İstanbul’da Mirahor mahallesi sâkinelerinden olup cünûn-ı mutbık ile mecnûne olan Kiryaki bt. Bazar nâm Nasrâniyye’nin tesviye-i umûruna kıbel-i şer‘den mansûb vasîsi olan râfi‘-i hâze’l-kitâb Ligori v. Setrati nâm zimmî meclis-i şer‘-i şerîfde takrîr-i kelâm ve ta‘bîr ani’l-merâm edip hâlâ vasîsi olduğum mecnûne-i merkūmenin nafakaya eşedd-i ihtiyâcı olup ve mahalle-i mezbûrede vâki‘ bir tarafdan Kostanta nâm zimmî mülkü ve bir tarafdan Abdullah Çelebi nâm kimesne mülkü ve bir tarafdan ( ) Ermeni mülkü ve bir tarafdan tarîk-i âm ile mahdûd büyût-ı adîdeyi müştemil menzilinden mâ‘adâ ism-i mâl ıtlâk olunur bir nesnesi olmamağla semeninden mecnûne-i mezbûreye kadr-i ma‘rûf infâk için menzil-i mezbûru semen-i misli ile âhara bey‘a taraf-ı şer‘-i şerîfden bana izin verilmek matlûbumdur dedikde kaziyye minvâl-i muharrer üzre olduğu zeyl-i kitâbda isimleri mastûr olanların ihbârlarıyla müte‘ayyin olmağın vasîsi mezbûr Ligori’ye taraf-ı şer‘den ber vech-i muharrer izin verilmeğin, mâ hüve’l-vâki‘ bi’t-taleb ketb olundu. Fî selh-i şehri Rebî‘ilâhir li sene seb‘a ve semânîn ve elf. Şuhûdü’l-hâl: İsmail b. Mehmed el-Müezzin, Ali Efendi b. Veli el-İmâm, İbrahim Çelebi b. Mehmed, Osman b. Ömer, Şole v. Preşkova, İmre v. İstol, Kostanta v. Yorgi, Yani v. Yorgi, Andriye v. Manol, Keriderişko? v. Mersiyodel?.