İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 584 Hüküm no: 636 Orijinal metin no: [183b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın eşya davasında damadı Mehmed Çelebi b. İbrahim ile sulh olduğu Mahmiye-i İstanbul’da Davud Paşa mahallesi sâkinelerinden Fâtıma bt. Abdullah nâm hâtun meclis-i şer‘-i şerîfde dâmâdı bâ‘is-i hâze’l-kitâb Mehmed Çelebi b. İbrahim nâm kimesne mahzarında ikrâr ve takrîr-i kelâm edip târih-i kitâbdan bir sene mukaddem mezbûr Mehmed Çelebi bi gayri hakkın bir sîm kuşak ve üç ayaklı bir çift altın küpe ve bir kebîr tepsi ve bir tencere ve bir Selânik yan keçesi ve beş sahan ve bir çift münakkaş yastığı ahz u kabz etmekle bundan akdem eşyâ-i mezkûreyi mezbûr Mehmed Çelebi’den da‘vâ ve taleb eylediğimde, ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûr Mehmed Çelebi ile beynimizde iki yüz akçe üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz akçeyi mezbûr Mehmed Çelebi yedinden tamâmen ve kemâlen ahz u kabz ettiğimden, husûs-ı mezkûre müte‘allika da‘vâdan mezbûr Mehmed Çelebi’nin zimmeti ibrâ ve iskāt edip ol dahi bedel-i sulh-ı mezbûre müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. [184a] Fî gurreti Cemâziyelevvel li sene seb‘a ve semânîn ve elf. Şuhûdü’l-hâl: Es-Seyyid Süleyman bin es-Seyyid Ali, Mehmed Çelebi b. Mustafa, İsmail Çelebi b. Mehmed, İbrahim Çelebi [b.] Mustafa, İbrahim Çelebi b. Ahmed, İbrahim b. ( ), Mustafa b. Ali ve gayruhüm mine’l-hâzırîn.