İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 584 Hüküm no: 637 Orijinal metin no: [184a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye bt. Abdullah’ın Kadıköy Osman Ağa Camii Vakfı’na ait odayı haksız yere zabtetmediğinin anlaşıldığı Mahmiye-i İstanbul’da Ayasofya-i kebîr câmi‘-i şerîfi kurbunda vâki‘ odalarda sâkin olup merhûm Osman nâm sâhibü’l-hayrın mahrûse-i Üsküdar’a tâbi‘ Kadıköyü nâm karyede vâki‘ câmi‘-i şerîfi vakfının câbisi olan Hasan b. Ömer nâm kimesne meclis-i şer‘-i şerîfde vakf-ı mezbûra hâlâ mütevellî olan Hüseyin Ağa b. Kenan nâm kimesne ile vakf-ı mezbûrdan olup mahmiye-i mezbûrede Emir Buhârî mahallesinde vâki‘ iki tarafdan vakf-ı mezbûrdan olan odalar ve bir tarafdan Medîne-i Münevvere vakfı ve bir tarafdan tarîk-i âm ile mahdûd bir bâb müte’ehhil odasına vâzı‘atü’l-yed olduğu mütehakkik olan bâ‘isetü hâze’l-kitâb Safiye bt. Abdullah nâm hâtun mahzarlarında üzerlerine da‘vâ ve takrîr-i kelâm edip mezbûre Safiye’nin zevci olup oda-i mezkûreye icâre-i mu‘accele ve yevmî iki akçe icâre-i müeccele ile mutasarrıf olan Mustafa b. Abdullah nâm kimesne bin seksen dört senesi Recebi’nde fevt olmağla oda-i mezkûre intikāl-i âdî ile evlâd-ı sıgārı Ahmed ve Mehmed ve Sâlih ve Ayşe’ye intikāl edip ba‘dehu sıgār-ı mezbûrûn dahi müte‘âkiben fevt olmağla oda-i mezkûre vakf-ı mezbûre âid olmağla vakf-ı mezbûra mütevellî iken vefât eden Hasan nâm kimesne hayâtında bin seksen beş senesi Zilka‘desi gurresinde sekiz bin akçe icâre-i mu‘accele ve yevmî bir akçe icâre-i müeccele ile oda-i mezkûreyi bana îcâr, ben dahi istîcâr edip mütevellî-i mezbûr Hasan yedime temessük dahi verip oda-i mezkûre taht-ı tasarrufumda olmuş iken, hâlâ mezbûre Safiye oda-i mezkûreye bi gayr-ı vech vaz‘-ı yed edip hâlâ mezbûre Safiye’ye suâl olunup oda-i mezkûreden kasr-ı yed edip bana teslîme tenbîh olunmak matlûbumdur dedikde gıbbe’s-suâl mezbûre Safiye cevâbında mütevellî-i mezbûr Hasan müte‘âkiben vefât eden sıgār-ı mezbûrûn Ahmed ve Mehmed ve Ayşe’nin oda-i mezkûreden hisselerini bin seksen dört senesi Recebi gurresinde dört bin akçe icâre-i mu‘accele ile mezbûr Sâlih’in hissesi bin seksen beş senesi Muharrem gurresinde üç bin akçe icâre-i mu‘accele ile bana îcâr ve teslîm ben dahi vech-i muharrer üzre istîcâr ve tesellüm ve mu‘accele-i mezbûre cem‘an yedi bin akçeyi mütevellî-i mezbûr Hasan’a teslîm ol dahi vakf-ı mezbûr için kabz ve tesellüm edip oda-i mezkûrenin cümlesi benim taht-ı tasarrufumda olup hattâ mütevellî-i mezbûr Hasan yedime mazmûnları min külli’l-vücûh takrîr-i meşrûhuna muvâfık iki temessük dahi vermişdi biri bin seksen dört Recebi gurresiyle müverrah ve biri bin seksen beş senesi Muharrem gurresiyle müverrah ve mütevellî-i mezbûr [184b] Hasan’ın hat ve hatmini hâvî iki kıt‘a temessük ibrâz edip müdde‘î-i mezbûr Hasan’a suâl olundukda ol dahi zikr olunan iki kıt‘a temessükün mazmûnlarını ikrâr ve i‘tirâf etmeğin mûcebince müdde‘î-i mezbûr Hasan ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene seb‘a ve semânîn ve elf. Şuhûdü’l-hâl: Mehmed b. Sunullah el-Mübâşir, Hüseyin b. Abdullah, İmâm Mustafa Efendi b. el-Hâc Ahmed, Ahmed Çelebi b. Halil, Abdullah b. Ahmed ve gayruhüm.