İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 585 Hüküm no: 638 Orijinal metin no: [184b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. İbrahim ve eşi Belkıs bt. Abdullah’ın Karabaş mahallesindeki evlerini İsmail Efendi b. Mehmed’e sattıkları Mahmiye-i İstanbul’da Yenibahçe kurbunda Karabaş mahallesi sâkinlerinden Hüseyin b. İbrahim nâm kimesne ile zevce olup zâtı ma‘rifet-i şer‘iyye ile ârifân mahalle-i mezbûre imâmı Hasan Efendi b. Mustafa ve Abdullah Halîfe b. Ramazan nâm kimesneler ta‘rîfleri ile mua‘rrefe olan Belkıs bt. Abdullah nâm hâtun meclis-i şer‘-i şerîfde mahalle-i mezbûrda sâkine olup Dergâh-ı âlî yeniçerileri halîfelerinden baş halîfe olan umdetü erbâbü’t-tahrîr ve’l-kalem zübdetü ashâbü’t-takrîr ve’r-rakam bâ‘is-i hâze’l-kitâb İsmail Efendi b. Mehmed tarafından husûs-ı âti’l-beyâna vekîl olduğu mu‘arrifân-ı mezbûrân Hasan Efendi ve Abdullah Halîfe şehâdetleri ile sâbit olan Ahmed Efendi b. Ali nâm kimesne mahzarında her biri ikrâr ve takrîr-i kelâm edip akd-i âti’z-zikrin sudûruna değin ale’l-iştirâki’s-seviy silk-i mülkümüzden münselik olup mahalle-i mezbûrede vâki‘ iki tarafdan müşterî-i mezbûr İsmail Efendi mülkü ve bir tarafından Ayşe Hâtun vakfı ve bir tarafdan tarîk-i âm ile mahdûd dört bâb fevkānî oda ve dehliz ve kenîf ve tahtânî bir kenîf ve bi’r-i mâ ve bir ahır ve zât-ı eşcâr-ı müsmire ve gayr-ı müsmire bahçeyi muhtevî mülk menzilimizi, tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz esedî guruşa mezbûr İsmail Efendi’ye bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semen olan meblağ-ı mezbûr beş yüz esedî guruşu bize edâ ve teslîm biz dahi her birimiz meblağ-ı mezbûrdan hissemiz olan ikişer yüz ellişer esedî guruşu mezbûr İsmail Efendi yedinden tamâmen ahz u kabz eyledik ba‘de’l-yevm menzil-i mahdûd-ı mezkûr merkūm İsmail Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Cemâziyelevvel li sene seb‘a ve semânîn ve elf. Şuhûdü’l-hâl: Ahmed Efendi b. Mustafa kîsedâr hâlâ, Mustafa b. Hasan Halîfe, Kadri b. Mustafa Halîfe, Mehmed Çelebi b. Ahmed es-sâkin fî Bâb-ı Top, Kapıcızâde Mehmed, Selim b. Âdem, Hasan Efendi b. Mustafa el-İmâm, Abdullah b. Ramazan el-Müezzin, Mehmed b. Ahmed, Mehmed Ağa b. Yusuf ve gayruhüm mine’l-hâzırîn.