İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 586 Hüküm no: 639 Orijinal metin no: [186a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Pîrce’nin kaybedip Mustafa Beşe b. Ahmed’in elinde bulduğu beygirinin kendisine teslimi Mahmiye-i İstanbul hısnı ebvâbından Kapan-ı dakīk kapısı dâhilinde sâkin işbu râfi‘ü’l-kitâb Mustafa b. Pîrce nâm kimesne meclis-i şer‘-i hatîr-i lâzımü’t-tevkīrde diğer Mustafa Beşe b. Ahmed nâm kimesne mahzarında üzerine da‘vâ ve takrîr-i kelâm edip işbu mevcûd bi’l-meclis doru alaca iğdiş bârgirimi târih-i kitâbdan bir sene mukaddem yedimde mülküm olduğu hâlde mülkümden zâyi‘ olmuşdu hâlâ mezbûr diğer Mustafa Beşe yedinde buldum bi gayri hakkın vaz‘-ı yed etmekle suâl olunup kasr-ı yedine bana teslîme mezbûr diğer Mustafa Beşe’ye tenbîh olunmak matlûbumdur dedikde gıbbe’s-suâl mezbûr diğer Mustafa Beşe cevâbında mezbûr bârgir gāib ani’l-meclis şerîkim ( ) ile mukaddemâ ismi ma‘lûmumuz olmayan bir kimesneden semen-i ma‘lûm-ı medfû‘a iştirâ eylediğimiz hasebiyle vaz‘-ı yed ederim deyû vech-i muharrer üzre müdde‘î-i mezbûrun mülkü olup mülkünde iken zâyi‘ olduğunu münkir olıcak müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup yine Kapan-ı dakīk kurbunda sâkin Ali Bey b. Pîrce ve mahmiye-i mezbûrede Debbâğ Yunus mahallesinde sâkin Hasan Beşe b. Mehmed nâm kimesneler li ecli’ş-şehâde mahfil-i şer‘a hâzırân olup isre’l-istişhâd, fi’l-vâki‘ sâlifü’z-zikr bârgir müdde‘î-i mezbûr Mustafa b. Pîrce’nin mülkü olup yedinde mülkü olduğu hâlde târih-i mezbûrda mülkünden zâyi‘ olmuş idi biz bu husûsa bu vech üzre şahidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra sâlifü’z-zikr bârgiri bir kimesneye bey‘ veya hibe etmeyip ve yâhud taraf-ı şer‘iyyeden bir tarîk ile mülkünden ihrâc ettiğine mezbûr Mustafa b. Pîrce’ye yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin mûcebiyle mârrü’z-zikr bârgiri müdde‘î-i mezbûra red ve teslîme mezkûr diğer Mustafa Beşe’ye tenbîh birle, mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi Serbölük, Hasan Çelebi el-Muhzır, el-Hâc Mustafa Bey Serbölük, İsmail Çelebi el-Muhzır ve gayruhüm.