İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 587 Hüküm no: 640 Orijinal metin no: [186a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ortaköy’den Dimo v. Yani’nin Balıkpazarı’ndaki fırın hissesi ile bitişiğinde bulunan at değirmenindeki hissesini Yani v. Londo’ya sattığı Mahrûse-i Galata’ya tâbi‘ Ortaköy’de sâkin Dimo v. Yani zimmî meclis-i şer‘-i şerîf-i lâzımü’t-teşrîfde, bâ‘isü’s-sifr Yani v. Londo nâm zimmî muvâcehesinde ikrâr ve takrîr-i kelâm edip mahmiye-i İstanbul hısnı ebvâbından Balıkpazarı kapısı dâhilinde vâki‘ fırın içinde mevcûd olan Fırınpazarı kapısı dâhilinde vâki‘ fırın içinde mevcûd olan fırın âlâtının dört sehimden hissem olan bir sehm-i şâyi‘ ile zikr olunan fırına muttasıl olan at değirmeni içinde mevcûd olan yirmi bârgir ve iki çarh ve dört taş ve sâir beynimizde ma‘lûm değirmenci âlâtından dahi kezâlik dört sehimden bir sehim hisse-i şâyi‘amı bi safkatin vâhidetin mezbûr Yani’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î [186b] ile yüz otuz esedî guruşa bey‘ ve teslîm edip ol dahi vech-i muharrer üzre iştirâ ve tesellüm ettiğinden sonra semeni olan meblağ-ı mezbûr yüz otuz esedî guruşu mezbûr Yani yedinden tamâmen ahz u kabz eyledim. Min ba‘d zikr olunan fırının dört sehimden bir sehm-i şâyi‘i ve mârrü’z-zikr değirmen içinde olan yirmi re’s bârgir ve iki çarh ve dört taş ve sâir değirmenci âlâtının dört sehimden bir sehm-i şâyi‘i mezbûr Yani’nin mülk-i müşterâsıdır, keyfe mâ yeşâ’ [ve] yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman b. Ömer, Ali Beşe b. Şaban, Muharrem b. Mahmud, Kara Mustafa b. Şaban, Ebûbekir b. Hüseyin, Ahmed Beşe b. Mehmed ve gayruhüm mine’l-hâzırîn.