İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 592 Hüküm no: 647 Orijinal metin no: [188a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydarhane mahallesinden Ceyhun bt. Abdullah ile Osman b. Ali’nin muhâla‘a yoluyla boşandıkları Mahmiye-i İstanbul’da Haydarhâne mahallesi sâkinelerinden Ceyhun bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa Çelebi b. Ali ve Mehmed Çelebi b. Mehmed nâm kimesneler şehâdetleri ile şer‘an sâbit olan Halil Efendi b. Abdülfettâh nâm kimesne meclis-i şer‘-i şerîfde müvekkilemin zevc-i dâhili bâ‘is-i hâze’l-kitâb Osman b. Ali nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrenin zevci mezbûr Osman zimmetinde mütekarrir ve ma‘kūdun-aleyh olan beş bin akçe mehr-i müeccel ve nafaka-i iddet-i mu‘ayyene-i ma‘lûmesi üzerlerine mezbûr Osman’ın firâşından hâsıl hamli dahi zuhûr ederse anı dahi yedi seneye değin kendi malından infâk ve iksâ etmek üzre me’ûnet-i süknâsı dahi kendi üzerine olmak üzre zevci mezbûr Osman ile muhâla‘a-i sahîha-i şer‘iyye ile muhâla‘a, ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika âmme-i da‘vâdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene seb‘a ve semânîn ve elf. Şuhûdü’l-hâl: Ahmed Çelebi b. Ali, İsmail Çelebi b. Mahmud, es-Seyyid Mehmed Halîfe b. ( ) el-Müezzin, el-Hâc Mustafa b. Mehmed, İbrahim Çelebi b. Mehmed ve gayruhüm.