İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 593 Hüküm no: 648 Orijinal metin no: [188a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Beşe b. İskender’in Seyyid Mehmed Çelebi’de olan alacağının vekili Ahmed Çelebi b. Mahmud’a verilmesi Darü’l-hilâfeti’l-aliyye Kostantıniyye el-mahmiye’de vâki‘ Çukurhamam kurbunda sâkin olup vilâyet-i Rumeli’nde bi tarîki’l-müsâfere medîne-i Bosna’da sâkin Davud Beşe b. İskender nâm kimesne tarafından husûs-ı âti’z-zikre vekâlet iddi‘â eden işbu râfi‘ü’l-kitâb umdetü’l-emâsil ve’l-erbâb Ahmed Çelebi b. Mahmud nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda, mahmiye-i İstanbul’da Hoca Hayreddin mahallesinde sâkin es-Seyyid Mehmed Çelebi zimmetinde beynlerinde ilm-i şer‘î ile ma‘lûm cihet-i deyn-i şer‘îden yetmiş kıt‘a esedî guruş hakkı olmağla mukaddemâ medîne-i mezbûreye gider olduğunda meblağ-ı mezkûru mezbûr es-Seyyid Mehmed Çelebi’nin taleb ve da‘vâ ve ahz u kabza ve kendiye îsâle tarafından beni vekîl ve nâib-i menâb ta‘yîn etmekle ben dahi vekâlet-i mezbûreyi kabûl ve merâsimini edâya ta‘ahhüd etmiş idim hâlâ vekâletim hasebiyle meblağ-ı mezkûru mezbûr es-Seyyid Mehmed [188b] Çelebi’den taleb eder[im] suâl olunsun dedikde gıbbe’s-suâl mezbûr es-Seyyid Mehmed Çelebi cevâbında fi’l-hakīka mezbûr Davud Beşe’nin zikr olunan Hoca Hayreddin mahallesinde sâkin olup bundan akdem vefât eden merhûm mezbûr es-Seyyid İbrahim Efendi zimmetinde cihet-i deyn-i şer‘îden yetmiş kıt‘a esedî guruş hakkı olup ve ben müteveffâ-yı mezbûrun terekesine bi’l-verâse vâzı‘ü’l-yed olmağla mezbûrun tereke-i müteveffâ-yı mezbûrdan mezbûr Davud Beşe’ye zimmetimde reddi vâcib [ve] hakkıdır deyû ikrâr lâkin müdde‘î-i mezbûrun mezkûr Davud Beşe tarafından husûs-ı mezbûre vech-i muharrer üzre olan vekâletini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup yine mahmiye-i mezbûrede Harâccı Muhyiddin mahallesinde sâkin Ali Çelebi b. Mustafa ve Süleyman Çelebi b. Hasan nâm kimesneler li ecli’ş-şehâde mahfil-i şer‘a hâzırân olup isre’l-istişhâd fi’l-vâki‘ müvekkil-i mezbûr Davud Beşe mukaddemâ medîne-i mezbûreye gider olduğunda mezbûr es-Seyyid Mehmed Çelebi zimmetinde beynlerinde ilm-i şer‘î ile ma‘lûm cihet-i deyn-i şer‘îden hakkı olan yetmiş esedî guruşu mezbûr es-Seyyid Mehmed Çelebi’den taleb ve da‘vâ ve ahz u kabza ve kendiye îsâle tarafından müdde‘î-i mezbûr Ahmed Çelebi’yi bizim huzûrumuza vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd eylemişdi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebiyle meblağ-ı mezkûr yetmiş esedî guruşu müteveffâ-yı mezbûrun tereke-i vâfiyesinden vekîl-i mezbûr Ahmed Çelebi’ye edâ ve teslîme mezkûr es-Seyyid Mehmed Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene seb‘a ve semânîn ve elf min hicreti men lehü’l-izzi ve’ş-şeref. Şuhûdü’l-hâl: Fahrü’l-eşbâh İbrahim Çelebi Serbölük, Umdetü’l-emâcid Hüseyin Çelebi, Ali Çelebi b. Mustafa, Süleyman Çelebi [b.] Hasan ve gayruhüm.