İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 594 Hüküm no: 649 Orijinal metin no: [188b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Karabet’in Ovanes v. Makro’da alacağı olduğu Mahmiye-i İstanbul’da Horhor kurbunda sâkin ekmekçi tâ’ifesinden bâ‘is-i hâze’s-sifr Karabet v. Dirador nâm Ermeni meclis-i şer‘-i şerîf-i lâzımü’t-teşrîfde, Ovanes v. Marko nâm zimmî muvâcehesinde üzerine da‘vâ ve takrîr-i kelâm edip mezbûr Ovanes zimmetinde cihet-i karz-ı şer‘îden yirmi buçuk esedî guruş hakkım olmağla suâl olunup alıverilmesi matlûbumdur dedikde gıbbe’s-suâl mezbûr Ovanes cevâbında müdde‘î-i mezbûre cihet-i merkūmeden zimmetinde ancak on yedi esedî guruş deynim vardır deyip ziyâde üç buçuk esedî guruş deyni olduğunu inkâr etmeğin müdde‘î-i mezbûrdan ziyâde da‘vâsiyçün beyyine taleb olundukda ityâniyçün istimhâl etmekle mehl-i şer‘î ile imhâl olundukdan sonra ikrârı mertebesi olan meblağ-ı mezbûr on yedi esedî guruşu müdde‘î-i mezbûra edâ ve teslîme merkūm Ovanes’e tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Ali Beşe b. Şaban, Kara Mustafa b. Şaban, Ebûbekir b. Hüseyin, Muharrem b. Ömer, Mehmed b. Ali, Mustafa Çelebi b. Osman ve gayruhüm.