İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 595 Hüküm no: 650 Orijinal metin no: [188b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Matnoz’un kendisini dövüp yaralayan Mahmud Çelebi b. Ahmed ile sulh olduğu Mahmiye-i İstanbul’da Cebeali Kapısı dâhilinde sâkin saka tâ’ifesinden Serkis v. Matnoz nâm zimmî meclis-i şer‘de, bâ‘is-i hâze’l-kitâb Mahmud Çelebi b. Ahmed muvâcehesinde üzerine takrîr-i da‘vâ edip mezbûr Mahmud beni Mimar Ağa çeşmesinde kırba ile su alır iken kırbam hatâ’en mezbûr Mehmed’e dokunmağla ol dahi bana şetm ve beni hilâf-ı şer‘-i şerîf başıma ve gözüme yumruk ile darb edip ve sol gözümü mecrûh etmekle ben dahi mûceb-i şer‘îsini mezbûrdan taleb ve da‘vâ sadedinde olmağla beynimizde münâza‘ât-ı kesîre cereyân [189a] etmiş idi el-hâletü hâzihî vesâtat-ı muslihîn ile cerh-i mezbûrun mûcebini da‘vâdan mezbûr Mahmud ile buçuk esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulhü mezkûr Mehmed yedinden tamâmen ahz ve mûcib-i da‘vâdan zimmetini ibrâ eyledim. Eğer cerh-i mezbûrun te’sîr ve iştidâdından gözüm helâk olursa mezbûr Mahmud’dan da‘vâ nizâ‘ım yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Hasan Efendi b. Mehmed, Mehmed Efendi b. Ahmed, İbrahim Efendi b. Hasan Mustafa b. ( ), Hüseyin b. Ali ve gayruhüm mine’l-hâzırîn.