İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 595 Hüküm no: 651 Orijinal metin no: [189a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hasan’ın Hoca Üveys mahallesindeki evini Safiye bt. Abdullah’a sattığı Mahmiye-i İstanbul’da Hoca Üveys mahallesi sâkinlerinden olup Dergâh-ı âlî yeniçerilerinden otuz yedinci bölüğe mahsûs odada hâlâ odabaşı olan Mehmed Beşe b. Hasan nâm kimesne meclis-i şer‘-i şerîfde mahalle-i mezbûre sâkinelerinden bâ‘isetü hâze’l-kitâb Safiye bt. Abdullah nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ârifân Ali Beşe b. Hızır ve Abdullah Efendi b. el-Hâc Mehmed nâm kimesneler şehâdetleri ile şer‘an sâbite olan Ahmed Beşe b. Hızır nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrda vâki‘ bir tarafdan âhar mülküm olan menzil ve iki tarafdan tarîk-i âm ve bir tarafdan tarîk-i hâs ile mahdûd hâriciyyesinde fevkānî iki bâb oda ve bir sofa ve dehliz ve tahtânî bir matbah ve iki bâb oda ve bir sofa ve kenîf ve bi’r-mâyı müştemil menzilimi, bi cümleti’t-tevâbi‘ ve’l-levâhık müvekkil-i mezbûre Safiye Hâtun’a dört yüz esedî guruşa tarafeynden îcâb ve kabûlü hâviye bey‘-i kat‘î ile bey‘ ve teslîm ol dahi iştirâ ve tesellüm ettiğinden sonra semen-i mezbûr dört yüz guruşu bana edâ ve teslîm ben dahi yedinden tamâmen ahz u kabz eyledim ba‘de’l-yevm zikr olunan menzil-i mezbûre Safiye Hâtun’un mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene seb‘a ve semânîn ve elf. Şuhûdü’l-hâl: Mefharü’l-kuzât el-Hâc Hasan Efendi, eş-Şeyh Abdullah Efendi b. Mehmed, Ahmed Efendi b. Receb, Mustafa Efendi b. el-Hâc Veli el-İmâm, İbrahim Odabaşı, Osman Odabaşı, Mustafa Beşe ve gayruhüm.