İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 596 Hüküm no: 652 Orijinal metin no: [189a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Bektaş Beşe b. Hüseyin’in parasını çalmakla itham ettiği Bandel v. Yakob aleyhine açtığı davada iddiasını ispat edemediği Mahmiye-i İstanbul hısnı ebvâbından Odunkapısı kurbunda vâki‘ kasab dükkânında sâkin Bektaş Beşe b. Hüseyin nâm kimesne meclis-i şer‘-i hatîr-i lâzımü’t-tevkīrde bâ‘is-i hâze’s-sifr Bandel v. Yakob nâm zimmî mahzarında üzerine da‘vâ ve takrîr-i kelâm edip bundan akdem mezbûr Bandel dükkânım içinde olan kapamamın cebinden on iki guruşumu bi gayri hakkın ahz u kabz etmeğin suâl olunup meblağ-ı mezbûr on iki guruşun mezbûr Bandel’den bana alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûr Bektaş Beşe’den müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Bandel’e müdde‘î-i mezbûrun dükkânını içinde olan kapamasının cebinden on iki guruşunu ber vech-i muharrer ahz kabz etmediğine yemîn teklîf olundukda ol dahi alâ vefki’s-mes’ûl yemîn billâhi’llezî enzele’l-İncîle alâ İsâ -aleyhi’s-selâm-etmeğin mûcebiyle müdde‘î-i mezbûr Bektaş Beşe bilâ-beyyine ber vech-i muharrer mu‘ârazadan men‘ birle, mâ vaka‘a bi’t-taleb ketb olundu. Fi’l-yevmi’s-sâmin min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman b. Ömer, Ebûbekir b. Hüseyin, Ali b. Şaban, Mehmed b. ( ) Mustafa b. Ali ve gayruhüm.