İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 596 Hüküm no: 653 Orijinal metin no: [189b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Altıpoğaça mahallesinden Kerime bt. Mehmed’in kocası Mehmed Beşe b. Enbiyâ’dan muhâla‘a yoluyla boşandığı Mahmiye-i İstanbul’da Altıpoğaça mahallesi sâkinelerinden olup zâtı mahalle-i mezbûre sükkânından Müezzin Sinan Efendi b. Ali ve Ali Efendi b. Mehmed nâm kimesneler ta‘rîfleriyle mu‘arrefe olan Kerime bt. Mehmed nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Mehmed Beşe b. Enbiyâ nâm kimesne mahzarında ikrâr-ı tâm ve takrîr-i ani’l-merâm edip zevcim mezbûr Mehmed Beşe zimmetinde mütekarrir ve ma‘kūdun-aleyh olan bin üç yüz yirmi akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine me’ûnet-i süknâm dahi kendi üzerime olmak üzre zevcim mezbûr Mehmed Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eylediğinden sonra hukūk-ı zevciyyete müte‘allik âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Ali Beşe b. Abdullah, Receb Efendi b. Hasan, Davud Beşe b. Abdullah, Mehmed Beşe b. Ahmed, Ahmed b. Mehmed, Osman Çelebi b. Ömer gayruhüm mine’l-hâzırîn.