İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 597 Hüküm no: 654 Orijinal metin no: [189b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Abdi’nin menzilini Yavaşça Mehmed Ağa Vakfı’na bey‘ bi’l-istiğlâl yoluyla sattığı Mahmiye-i İstanbul’da Gürcübaşı mahallesi sâkinelerinden olup zâtı ma‘rifet-i şer‘iyye ile ârifân Ali Çelebi b. Sâmî ve Yusuf Çelebi b. Nebi nâm kimesneler ta‘rîfleriyle mu‘arrefe olan Ümmühâni bt. Abdi nâm hâtun meclis-i şer‘-i şerîfde Yavaşça Mehmed Ağa vakfına bi’l-fi‘l mütevellî olan bâ‘is-i hâze’l-kitâb Abdülbâkī Ağa b. Ahmed nâm kimesne tarafından husûs-ı âti’l-beyân vekîl olduğu şâhidân-ı mezbûrân Ali Çelebi b. Sâmî ve Yusuf Çelebi b. Nebi nâm kimesneler şehâdetleri ile vekâleti sâbite olan Ahmed Çelebi b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin taht-ı mülkümde olup mahalle-i mezbûrda vâki‘ bir tarafdan Kâmile bt. Abdi mülkü ve bir tarafdan Emine bt. Abdi mülkü ve bir tarafdan Kâmile bt. Abdi mülkü ve bir tarafdan Medîne-i Münevvere’ye vakıf menzil ve bir tarafdan tarîk-i âm ile mahdûd mülk menzilimi, bi cümleti’t-tevâbi‘ ve’l-levâhık müteveffâ mezbûr Abdülbâkī Ağa’ya bi tarîki’l-istiğlâl iki yüz esedî guruşa bey‘ ve teslîm ol dahi ber vech-i muharrer yedinde olan mâl-ı vakf-ı mezbûr ile iştirâ ve kabz ve tesellüm eylediğinden sonra gıbbe’t-tahliyyeti’ş-şer‘iyye ve’t-tekābuzi’l-mer‘î menzil-i mezbûru târih-i kitâbdan üç sene tamâmına değin doksan esedî guruşa bana îcâr, ben dahi istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Cemâziyelevvel li sene seb‘a ve semânîn ve elf. Şuhûdü’l-hâl: Ramazan Bey b. Zülfikār, Ali Beşe b. Sabancı, Yakub b. Mustafa, Yusuf Beşe b. Abdullah, Mustafa Bey b. Ramazan, Veli Beşe b. Ömer, Ebûbekir Çelebi b. Hüseyin, İbrahim Çelebi b. Mehmed ve gayruhüm.