İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 598 Hüküm no: 656 Orijinal metin no: [190a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Abdi’nin borcuna karşılık Bezzâzistânî Mehmed b. Mustafa’ya samur kürkünü verdiği Mahmiye-i İstanbul’da Dülgerzâde mahallesi sâkinlerinden Bezzâzistânî Mehmed b. Mustafa nâm kimesne meclis-i şer‘-i şerîf-i lâzımü’t-teşrîfde, bâ‘is-i hâze’l-kitâb Mehmed Efendi b. Abdi nâm kimesne mahzarında ikrâr ve takrîr-i kelâm edip cihet-i karz-ı şer‘îden merkūm Mehmed Efendi zimmetinde dört yüz seksen altı guruş hakkım olmağla mezbûr Mehmed Efendi yedinde mülkü olan benefşe çukaya kaplı bir sırt samur kürkünü dört yüz seksen altı guruşa bana bey‘ ve teslîm ve semen-i mezbûru zimmetinde hakkım olan meblağ-ı mezbûr dört yüz seksen altı guruşa takās, ben dahi ba‘de’l-iştirâ ve’t-tesellüm mukāssa ve kabûl eyledim. Min ba‘d meblağ-ı mezbûr altı yüz seksen altı guruşdan zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene seb‘a ve semânîn ve elf. Şuhûdü’s-sâbık.