İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 599 Hüküm no: 657 Orijinal metin no: [190a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sofcu el-Hâc Hüseyin b. Nasûh’un vakıf evini Hacı Mustafa Ağa b. Abdülmennân’a devrettiği Mahmiye-i İstanbul’da Ali Paşa-yı Atîk mahallesi sâkinlerinden Sofcu el-Hâc Hüseyin b. Nasûh nâm [kimesne] meclis-i şer‘-i şerîf-i Ahmedî ve mahfil-i dîn-i münîf-i Muhammedî’de, mahrûse-i Edirne’de sâbıkan saray ağası olan umdetü’l-havâs ve’l-mukarrebîn mu‘temedü’l-mülûk ve’s-selâtîn bâ‘is-i hâze’l-kitâb el-Hâc Mustafa Ağa b. Abdülmennân taraflarından husûs-ı âti’l-beyâna nehc-i şer‘î üzre vekâleti sâbite olan Siyavuş Bey b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan ba‘zan Kazancızâde Sarayı demekle ma‘rûf olup Süleyman Efendi tasarrufunda olan menzil ve ba‘zan Zincirlikuyu hamamı külhanı ve bir tarafdan es-Seyyid Hasan Paşa vakfından zikr-i âtî bahçe ve bir tarafdan Sitti Hâtun vakfından olup Kâtib Mehmed Efendi tasarrufunda olan menzil ve bir tarafdan tarîk-i âm ile mahdûd olup muhavvata-i [hâ]riciyesinde üç bâb fevkānî oda ve iki sofa ve bir dehliz ve altında bir ahır ve bir oda ve bir su kuyusu ve bir kenîf ve muhavvata-i dâhiliyyesinde fevkānî bir bâb oda ve tahtânî iki bâb oda ve bir matbah ve bir sofa ve bir kenîf ve eşcâr-ı müsmire ve gayr-ı müsmire hadîkayı muhtevî bahçeyi müştemil menzilimi ve zikr-i âtî vakıf arsa üzerinde olan bir bi’r-i mâ ve bir havuz ve eşcâr-ı müsmireyi bi safkatin vâhidetin tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î ile [190b] müvekkil-i müşârün-ileyh el-Hâc Mustafa Ağa’ya iki yük akçeye bey‘ ve teslîm ve tefvîz-i âti’z-zikrlerin sudûruna değin yevmi iki akçe mukāta‘a ile es-Seyyid Hasan Paşa vakfından taht-ı tasarrufumda olup mahalle-i mezbûrede vâki‘ bir tarafdan hamam külhanı ve ba‘zan Vişnezâde Efendi odaları ve bir tarafdan Hatice Hâtun tasarrufunda olan vakıf menzil ve bir tarafdan ba‘zan Bâkīzâde Mustafa Efendi menzili ve ba‘zan imâm efendi veresesi menzilleri ve ba‘zan sekban Mahmud mülkü ve bir tarafdan sâlifü’z-zikr mülk menzil ile mahdûd bir havuz ve bir kebîr bi’r-i mâ ve eşcâr-ı müsmire ve gayr-ı müsmireyi muhtevî bahçe arsasını izn-i mütevellî ile kırk bin akçeye ferâğ ve tefvîz müvekkil-i müşârün-ileyh el-Hâc Mustafa Ağa dahi ber vech-i muharrer iştirâ ve tesellüm ve tefevvüz ve kabûl eyledikden sonra semen-i mezbûr iki yük akçe ve bedel-i mezbûr kırk bin akçe ki cem‘an iki yük kırk bin akçeyi müvekkil-i müşârün-ileyh el-Hâc Mustafa Ağa yedinden tamâmen ahz u kabz eyledim ba‘de’l-yevm menzil-i mahdûd-ı mezbûr ve bi’r-i mâ ve havuz ve eşcâr müvekkil-i müşârün-ileyh el-Hâc Mustafa Ağa’nın emlâk-i müşterâsıdır ve vakıf arsa hakk-ı müfevvezidir dedikde mukırr-ı mezbûr el-Hâc Hüseyin’in ikrâr-ı meşrûhunu vekîl-i mezbûr Siyavuş Bey vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm sipâhi Mustafa Efendi b. ( ), zahrü’l-müderrisînü’l-fihâm İdris Efendi, Kâtib Mehmed Efendi b. Hızır, Kilârî el-Hâc Ali, Şatırpaşalı Ali Bey, el-Hâc Yusuf b. Abdullah, Deli Beşe b. Abdullah, Ali Efendi İmâm-ı câmi‘-i Nişâncı Paşa, Mehmed Beşe el-Üsküdârî, es-Seyyid Muharrem Efendi b. es-Seyyid İsmail Efendi, Ahmed Efendi b. Ali Efendi, Mehmed Çelebi b. Ali Çelebi, Ali Çelebi b. Halil Çelebi, Ömer Efendi b. ( ) el-Müezzin, Yusuf Efendi b. Ahmed Efendi ve gayruhüm mine’l-hâzırîn.