İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 600 Hüküm no: 658 Orijinal metin no: [190b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri çorbacısı Şaban Ağa b. Hızır’ın terekesinden olan evinin vârisleri tarafından Mehmed Beşe’ye satıldığı Mahmiye-i İstanbul’da Hoca Üveys mahallesi sâkinlerinden olup Dergâh-ı âlî yeniçerilerinden seksen yedinci cemâ‘ate mahsûs oda çorbacısı iken vefât eden Şaban Ağa b. Hızır’ın verâseti, zevce-i metrûkesi Safiye bt. Abdullah ve li ebeveyn er karındaşları Ahmed Beşe ve Ali Beşe’ye ve li ebeveyn kız karındaşı Fâtıma’ya münhasıra olduğu şer‘an sâbite oldukdan sonra mezbûr Ali Beşe asâleten ve mezbûr Ahmed Beşe dahi kendi tarafından asâleten ve mezbûre Safiye tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân mezbûr Ali Beşe ile Abdullah Efendi b. el-Hâc Mehmed nâm kimesne şehâdetleriyle şer‘an sâbit olmağla vekâleten ve mezbûre Fâtıma’nın oğlu ve tarafından kezâlik husûs-ı âti’l-beyâna vekîl olduğu zâtı ma‘rifet-i şer‘iyye ile ârifân mezbûrân Ali Beşe ve Abdullah Efendi şehâdetleriyle şer‘an sâbit olan Mustafa Beşe b. Hasan dahi vekâleten meclis-i şer‘-i şerîfde otuz yedinci bölüğe hâlâ odabaşı olan bâ‘is-i hâze’l kitâb Mehmed Beşe b. Hasan nâm kimesne mahzarında her biri asâleten ve vekâleten ikrâr ve takrîr-i kelâm edip müteveffâ-yı mezbûr Şaban Ağa’nın terekesinden olup mahalle-i mezbûrede vâki‘ bir tarafdan tarîk-i hâs ve iki tarafdan tarîk-i âm ve bir tarafdan İsâ Efendi kızı ( ) nâm hâtun menzili ile mahdûd, hâriciyyesinde tabaka-i ulyâda beş bâb oda ve iki sofa ve bir kenîf ve vustâda üç bâb oda ve bir sofa ve süflîde bir ahır ve bi’r-i mâ ve havlu ve bahçeyi ve dâhiliyyesinde fevkānî iki bâb oda ve bir sofa ve tahtânî iki bâb oda ve bir matbah ve bi’r-i mâ ve bahçe [191a] ve kenîfi müştemil menzil ile hudûd-ı mezkûre dâhilinde tarîk-i âm tarafında vâki‘ hâriciyyesinde fevkānî iki bâb oda ve bir sofa ve tahtânî ve bir ahır ve dâhiliyyesinde fevkānî iki bâb oda ve bir sofa ve dehliz ve tahtânî bir matbah ve iki bâb oda ve bi’r-i mâ ve kenîfi müştemil menzili, cümle tevâbi‘ ve levâhıkları ve kâffe-i hukūk ve merâfıkları ile bi safkatin vâhidetin merkūm Mehmed Beşe’ye tarafeynden îcâb ve kabûlü hâviye bey‘-i kat‘î ile iki bin altı yüz esedî guruşa asâleten ve vekâleten bey‘ ve teslîm ol dahi iştirâ ve teslîm ettiğinden sonra semeni olan meblağ-ı mezbûr iki bin altı yüz esedî guruşu tamâmen bize edâ ve teslîm biz dahi yedinden asâleten ve vekâleten ahz u kabz eyledik ba‘de’l-yevm menzileyn-i merkūmeyn mezbûr Mehmed Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve tahkīki’l-mer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene seb‘a ve semânîn ve elf. Şuhûdü’l-hâl: Mefharü’l-kuzâti’l-müteşerri‘în el-Hâc Hasan Efendi, Şeyh Abdurrahman Efendi b. Mehmed, Ahmed Efendi b. Receb, sâbıkan Alâiye beyi fahrü’l-akrân Arslan Bey, Mustafa Efendi b. el-Hâc Veli el-İmâm, fahrü’l-akrân çorbacı Ali Ağa, Abdüllatîf Efendi b. el-Hâc Mehmed, İbrahim Odabaşı, Osman Odabaşı, Mustafa Beşe b. Ali Beşe b. Abdullah, Mustafa Efendi b. Mehmed ve gayruhüm mine’l-hâzırîn.