İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 605 Hüküm no: 666 Orijinal metin no: [192b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed b. Mehmed’in Şemseddin mahallesindeki evini Mehmed b. Şaban’a sattığı Mahmiye-i İstanbul’da Akşemseddin mahallesinde sâkin Ali Beşe b. Mehmed b. Mehmed nâm kimesne meclis-i şer‘-i şerîfde bâ‘is-i hâze’l-kitâb Mehmed b. Şaban nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Hamza Paşa b. Ali nâm kimesne mülkü ve bir tarafdan çörekçi Mahmud Beşe nâm kimesne mülkü ve bir tarafdan tabîb Hüseyin Çelebi nâm kimesne mülkü ve bir tarafdan tarîk-i hâs ile mahdûd olan fevkānî bir bâb oda ve kenîf ve cüneyne ve su kuyusunu müştemil mülk menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î yüz elli beş esedî guruşa mezbûr Mehmed’e bey‘ ve teslîm edip ol dahi ber vech-i muharrer iştirâ ve tesellüm ve kabûl ettiğinden sonra semeni olan meblağ-ı mezbûr yüz elli beş esedî guruşu mezbûr Mehmed yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Mehmed’in mülk-i müşterâsıdır keyfe mâ yeşâ’ ve yahtâr mutasarrıf olsun [193a] dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene seb‘a ve semânîn ve elf. Şuhûdü’l-hâl: El-Hâc İbrahim b. Ramazan, İbrahim Çelebi b. Nasûh, Osman Beşe b. Yahya, el-Hâc Ramazan b. Mustafa, el-Hâc İsâ b. Şaban ve gayruhüm.