İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 609 Hüküm no: 672 Orijinal metin no: [194a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Abdullah ile Mehmed Bey b. İbrahim’in evlendikleri Mahmiye-i İstanbul’da el-Hâc Muhyiddin mahallesinde sâkine Ümmühâni bt. Abdullah nâm bâliğa meclis-i şer‘-i şerîf-i enverde işbu hâzır bi’l-meclis Mehmed Bey b. İbrahim nâm kimesne mahzarında ikrâr ve takrîr-i kelâm edip zeyl-i vesîkada muharrerü’l-esâmî olan müslimîn huzûrlarında mezbûr Mehmed Bey’e bin akçe mehr-i müeccel üzerine ve iki yastık ve iki yemenî yorgan ve bir döşek ve bir kilim ve bir tencere ve bir el ibriği ve bir tas ve bir sepet sandığı mehr-i mu‘accel olmak üzre nefsimi tezvîc ve inkâh edip ol dahi ber vech-i muharrer tezevvüc ve kabûl eyledi dediğinde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. İsmail, Süleyman Çelebi b. Ahmed, İbrahim Çelebi b. Mehmed, Ebûbekir Beşe b. Hüseyin, Musa Efendi el-kâtib, Abdullah Efendi b. Veli ve gayruhüm.