İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 611 Hüküm no: 674 Orijinal metin no: [195a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Hacı Mustafa’nın küçük çocukları İsmail ve Ayşe üzerine İsmihan bt. Abdülvehhâb’ın vasî tayin olunduğu Vilâyet-i Anadolu’da medîne-i Ankara’da hisar dâhilinde Minâreli Mescid mahallesinde sâkin iken bundan akdem vefât eden el-Hâc Mustafa b. el-Hâc Memi’nin mahmiye-i İstanbul’da Karabaş mahallesinde mütemekkinân sulbî sagīr oğlu İsmail ile sulbiye sagīre kızı Ayşe’nin vasîleri olmayıp, tesviye-i umûrları için bir vasî nasb ve ta‘yîn olunmak elzem ve ehem ve vâlideleri hâzıre bi’l-meclis işbu râfi‘atü’l-kitâbü’l-müstetâb İsmihân Hâtun bt. Abdülvahhab müstakīm ve dindâr ve her vechile umûr-ı vesâyet ikāmesine kādire olduğu keyfiyyet-i hâline vâkıf ahbâr-ı sikāt ihbârı ile zâhir ve âşikâr olmağın sagīrân-ı mezbûrân babaları müteveffâ-yı mezbûrdan irs-i şer‘le isâbet eden mallarını evân-ı rüşdlerine değin zabt ve ahvâllerini hıfza savb-ı şer‘-i enverden vasî nasb ve ta‘yîn olundukda mezbûre İsmihân dahi vesâyet-i mezkûreyi kabûl ve hizmet-i lâzımesini kemâ-yenbağī edâya müte‘ahhide olmağın mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ aşer min Cemâziyelevvel li sene seb‘a ve semânîn ba‘de elf. Şuhûdü’l-hâl: Hasan Efendi b. Mustafa el-İmâm, Mustafa Ağa b. Mehmed, İbrahim Çelebi Serbölük, Osman Çelebi b. Ömer, Habib b. Mehmed ve gayruhüm mine’l-hâzırîn.