İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 611 Hüküm no: 675 Orijinal metin no: [195a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hanım bt. Mustafa Ağa’nın evini Sofcu Ali Efendi Vakfı’na bey‘ bi’l-istiğlâl yoluyla sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i kavîmden irsâl olan Mevlânâ Abdurrahman Efendi umdetü’l-emâcid ve’l-a‘yân Haseki Veli Ağa’nın halîlesi olan Râbia Hanım bt. el-merhûm Mustafa Ağa’nın mahmiye-i İstanbul’da Ali Paşa-yı Atîk mahallesinde sâkine olduğu menziline varıp, zeyl-i rakīmde mastûrü’l-esâmî olan sikāt-ı müslimîn huzûrunda akd-i meclis-i şer‘-i mübîn eyledikde mûmâ-ileyhâ Râbia Hanım zâtı ma‘rifet-i şer‘iyye ile ârifân sadrî oğlu Süleyman Ağa ve el-Hâc Hüseyin b. Nasûh ve Kenan Bey b. Abdullah nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı merkūmda, merhûm Sofcu Ali Efendi vakfına bi’l-fi‘l mütevellî olan fahrü’l-akrân bâ‘is-i hâze’l-kitâb el-Hâc Ahmed Ağa b. Hasan mahzarında bi tav‘ihâ ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan Şahbaz Bey vakfı olan odalar ve bir tarafdan kazasker karındaşı Bedir Hasan Efendi medresesi vakfı olan odalar ve bir tarafdan ba‘zan Halil Yazıcı? mülkü ve ba‘zan haffâf Mehmed Çelebi mülkü ve bir tarafdan tarîk-i âm ile mahdûd büyût-ı adîdeyi müştemil işbu menzilimi, cümle tevâbi‘ ve levâhıkı ile mütevellî-i mûmâ-ileyh Ahmed Ağa’ya bin beş yüz esedî guruşa târih-i kitâb senesi Muharremü’l-harâmı’nın yirmi dördüncü günü bi tarîki’l-istiğlâl bey‘ ve teslîm ol dahi bi’t-tevliyye iştirâ ve tesellüm ettiğinden sonra semeni olan meblağ-ı mezbûr bin beş yüz esedî guruşu zimmetimde vakf-ı mezbûra deynim olan bin yedi yüz elli guruşun bin beş yüz guruşuna takās, mütevellî-i mûmâ-ileyh Ahmed Ağa dahi mukāssa ve kabûl ettikden sonra menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î şehr-i mezbûrun yirmi dördüncü gününde bir sene tamâmına değin iki yüz yirmi beş guruşa bana îcâr ve teslîm ben dahi ber vech-i muharrer istîcâr ve tesellüm ettiğimden [195b] sonra deyn-i mezbûrun iki yüz elli guruşu zimmetimde vakf-ı mezbûra bâkī kalmışdır dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cemâziyelevvel li sene seb‘a ve semânîn ve elf. Şuhûdü’l-hâl: El-Hâc Hüseyin b. Nasûh, Mustafa Çelebi b. Hasan el-kâtib, İbrahim Efendi b. Mustafa, Mehmed Efendi b. Ahmed, Kenan Bey b. Abdullah, Şaban Çelebi b. Hasan ve gayruhüm.