İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 612 Hüküm no: 676 Orijinal metin no: [195b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Çelebi b. Mustafa’nın Bıçakçı Ali mahallesindeki evinin kendisine ve annesine ait hisselerini Ayşe bt. Halil’e sattığı Mahmiye-i İstanbul’da Bıçakçı Ali mahallesi sâkinlerinden Abdurrahman Çelebi b. Mustafa nâm kimesne kendi tarafından asâleten ve vâlidesi Râbia bt. Yusuf nâm hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Mehmed Efendi b. Ramazan ve Hüseyin Çelebi b. Ramazan nâm kimesneler şehâdetleri ile şer‘an sâbite olmağla vekâleten meclis-i şer‘-i şerîfde bâ‘isetü hâze’l-kitâb Ayşe bt. Halil nâm hâtun tarafından husûs-ı âti’l-beyâna vekîl olduğu kezâlik zâtını ma‘rifet-i şer‘iyye ile ârifân şâhidân-ı mezbûrân şehâdetleri ile şer‘an sâbite olan mezbûre Ayşe’nin zevci el-Hâc Osman b. Receb nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Abdurrahman mülkü ve bir tarafdan el-Hâc Osman mülkü ve bir tarafdan Meleki Hâtun vakfı ve bir tarafdan tarîk-i âm ile mahdûd menzilin dokuz sehminden dört sehmi benim mülküm ve bir sehmi müvekkile-i mezbûre Râbia’nın mülkü ve dört sehim dahi karındaşım gāib ani’l-meclis Mehmed Çelebi’nin olmağla hâlâ menzil-i mezbûrdan benim hissem olan dört sehmi asâleten ve vâlidem mezbûre Râbia’nın hissesi bir sehmi vekâleten cümle tevâbi‘ ve levâhıkları ile bi safkatin vâhidetin tarafeynin îcâb ve kabûlü hâviye bey‘-i bâtt-ı sahîh-i şer‘î ile müvekkile-i mezbûre Ayşe’ye yüz doksan guruşa bey‘ ve teslîm ol dahi iştirâ ve tesellüm ettiğinden sonra semeni olan meblağ-ı mezbûr yüz doksan guruşu müvekkile-i mezbûre Ayşe yedinden tamâmen ahz u kabz eyledim dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene seb‘a ve semânîn ve elf. Şuhûdü’l-hâl: Mustafa Bey b. Mehmed, Ahmed Çelebi b. Mustafa, Hüseyin Çelebi b. Ramazan, Mehmed b. Receb, Mehmed b. Veli, İbrahim Çelebi b. Ahmed, Ebûbekir b. Hüseyin ve gayruhüm mine’l-hâzırîn.