İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 613 Hüküm no: 677 Orijinal metin no: [195b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın Tuti Abdüllatif mahallesindeki evini satın alan Hacı Mehmed b. Receb’in parasını vekiline ödediği Vilâyet-i Anadolu’da Küre-i Cedîd kazâsına tâbi‘ Görene karye sâkinelerinden Emine bt. Abdullah nâm hâtun tarafından husûs-ı âtîye vekâlet iddi‘â eden zevci Ali b. Mehmed nâm kimesne meclis-i şer‘-i şerîf-i lâzımü’t-teşrîfde, mahmiye-i İstanbul’da Tûtî Abdüllatîf mahallesi sükkânından el-Hâc Mehmed b. Receb mahzarında bi’l-vekâle üzerine da‘vâ ve takrîr-i kelâm edip zevcem mezbûre Emine’nin sülüs akd-i âtî sudûruna değin taht-ı mülkünde olup mahalle-i mezbûrede vâki‘ bir tarafdan Derviş Efendi nâm kimesne mülkü ve bir tarafdan Mehmed Ağa vakfı ve bir tarafdan tarîk-i âm ile mahdûd tahtânî bir bâb oda ve bir sofa ve tahtapûş ve tahtında bir kiler ve bir mahtab ve bi’r-i mâ ve cüneyne ve bir kenîfi müştemil menzilini, semen-i misli ile âhara bey‘a ve semenini ahz u kabza ve kendiye îsâle ve kabz ve îsâle mütevakkıf olduğu umûrun küllîsine tarafından mukaddemâ beni vekîl ve nâib-i menâb nasb ve ta‘yîn eylediğinden sonra ben dahi vekâlet-i mezbûremi kabûl [196a] ve hıdemât-ı lâzımesini edâya ta‘ahhüd eylediğim hasebiyle, menzil-i mahdûd-ı mezbûru târih-i kitâb günü mezbûr el-Hâc Mehmed bana on dokuz bin fıddî râyic fi’l-vakt akçeye bey‘ ve teslîm edip ol dahi vech-i muharrer üzre iştirâ ve tesellüm ve kabûl eylemişdi hâlâ semeni olan meblağ-ı mezbûru mezkûr el-Hâc Mehmed’den taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Hacı Mehmed cevâbında fi’l-hakīka müdde‘î-i mezbûrdan menzil-i mezkûru semen-i mezbûra iştirâ ve kabûlünü ikrâr, lâkin müdde‘î-i mezbûrun vech-i muharrer üzre mezbûre Emine tarafından menzil-i mezkûru bey‘a vekîl olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mezbûre Emine’nin zâtını ma‘rifet-i şer‘iyye ile ârifân olup zikr olunan Görene karyesi sükkânından Ahmed b. Davud ve kazâ-i mezbûra tâbi‘ Süzay nâm karye sâkinlerinden olan Mustafa Beşe b. Mehmed nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ mezbûre Emine mahalle-i mezbûrede vâki‘ menzil-i mahdûd-ı mezkûrunu semen-i misli ile âhara bey‘a ve semenini ahz u kabza ve kendiye îsâle ve kabz ve îsâl mütevakkıf olduğu umûrun küllîsine müdde‘î-i mezbûru bizim huzûrumuzda vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve hıdemât-ı lâzımesini edâya ta‘ahhüd eylemişdi biz bu husûsa bu vech üzre şahidleriz, şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti merâsimi’l-kabûl şehâdetleri hayyiz-i kabûlde vâkı‘a olmağın mûcebiyle mezbûr Ali’nin vech-i muharrer üzre vekâlete ba‘de’l-hükmi’ş-şer‘î semen-i mezbûru vekîl-i merkūm Ali’ye edâ ve teslîme merkūm el-Hâc Mehmed’e tenbîh olundukdan sonra müdde‘î-i mezbûr Ali meclis-i şer‘de, merkūm Hacı Mehmed mahzarında ikrâr ve takrîr-i kelâm edip ânifen edâsına tenbîh olunan meblağ-ı mezbûr on dokuz bin akçeyi merkūm el-Hâc Mehmed yedinden bi’l-vekâle tamâmen ahz u kabz eyledim ba‘de’l-yevm menzil-i mahdûd-ı mezbûr merkūm el-Hâc Mehmed’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Cemâziyelevvel li sene seb‘a ve semânîn ve elf. Şuhûdü’l-hâl: Fahrü’l-kuzât Abdurrahman Efendi, el-Hâc Mehmed Beşe b. Davud, Yusuf Efendi imâm-ı mahalle-i merkūme, Mehmed Efendi imâm-ı mahalle-i Mimar Sinan, Yusuf Beşe er-râcil, İsmail Çelebi b. Hüseyin, Hüseyin Beşe b. Receb İbrahim Çelebi ve gayruhüm.