İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 614 Hüküm no: 678 Orijinal metin no: [196a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahriye bt. Hacı Hasan’ın evini bey‘ bi’l-istiğlâl yoluyla Cafer Çelebi Vakfı’na sattığı Mahmiye-i İstanbul’da Yenibahçe kurbunda Karabaş mahallesi sâkinelerinden olup zâtı ma‘rifet-i şer‘iyye ile ârifân Hasan Efendi b. Mustafa ve Habib b. Mehmed nâm kimesneler ta‘rîfleri ile mu‘arrefe olan Fahriye bt. el-Hâc Hasan nâm hâtun meclis-i şer‘-i şerîfde merhûm Cafer Çelebi nâm sâhibü’l-hayrın nukūd-ı mevkūfesine bi’l-fi‘l mütevellî olan Mehmed Çelebi b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Mustafa odaları ve bir tarafdan yine mezbûr el-Hâc Mustafa’nın mülk menzili ve bir tarafdan Hüsameddin Ağa mülkü ve bir tarafdan tarîk-i âm ile mahdûd, fevkānî bir bâb oda ve bir sofa ve tahtânî bir bâb oda ve kenîf ve cüneyneyi müştemil menzilimi, cümle tevâbi‘ ve levâhıkı ile mütevellî-i mezbûr Mehmed Çelebi’ye bi tarîki’l-istiğlâl yirmi beş esedî guruşa bey‘ ve teslîm ol dahi ber vech-i muharrer iştirâ ve kabûl [196b] eylediğinden sonra semeni olan meblağ-ı mezbûr yirmi beş esedî guruş mütevellî-i mezbûr Mehmed Çelebi mâl-ı vakf-ı mezbûrdan bana edâ ve teslîm ben dahi yedinden ahz u kabz eylediğimden sonra menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î üç sene tamâmına değin her senede üç guruş üç rub‘a mütevellî-i mezbûr Mehmed Çelebi bana îcâr, ben dahi ber vech-i muharrer istîcâr eyledim dedikde gıbbe’t-tasdîki’ş-şer‘î mukırr-ı mezbûrenin zevci işbu hâzır bi’l-meclis Mustafa Beşe b. Muslu derk-i menzile ve asl-ı mâla ve ücret-i lâzımeye tarafeynden emir ve kabûlü hâviye kefâlet-i sahîha-i şer‘iyye ile kefîl olduğundan sonra mezbûre Fahriye meclis-i şer‘de i‘âde-i kelâm edip sinîn-i mezkûre tamâmında meblağ-ı mezbûru ve ücret-i lâzımeyi edâ eyledimez isem menzil-i mahdûd-ı mezkûru semen-i misli ile âhara bey‘ ve semenini ahz u kabza ve semeninden mütevellî-i mezbûru Mehmed Çelebi’ye deyn-i mezbûr ile ücret-i lâzımeyi edâya ve fazla kalırsa bana îsâle ve bey‘ ve kabz ve îsâl mütevakkıf olduğu umûrun küllîsine işbu hâzır bi’l-meclis mahalle-i mezbûre imâmı Hasan Efendi b. Mustafa Efendi tarafından vekîl ve menâbıma nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya [mü]te‘ahhid olmağın mâ vaka‘a bi’t-taleb ketb olundu. Fi’l-yevmi’s-sâlis aşer min Cemâziyelevvel li sene seb‘a ve semânîn ve elf. Şuhûdü’l-hâl: Yahya Çelebi b. Receb, Yarıcı Mehmed b. Handan, Hasan b. Ramazan, Muharrem b. Şaban, Receb b. Arslan, el-Hallâc Mustafa, el-Hâc Mehmed, Mehmed b. Veli ve gayruhüm.