İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 615 Hüküm no: 679 Orijinal metin no: [196b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdi’nin alacak hususunda Hacı Hüseyin b. Nasûh ile sulh olduğu Mahmiye-i İstanbul’da hısnı ebvâbından Kumkapısı dâhilinde Nişâncı mahallesi sâkinelerinden olup zâtını ma‘rifet-i şer‘iyye ile ârifân Abdullah Efendi b. Mehmed ve Osman Çelebi b. Mustafa nâm kimesneler ta‘rîfleri ile mu‘arrefe Ayşe bt. Abdi nâm hâtun tarafından husûs-ı âti’l-beyâna vekîli olduğu mu‘arrifân-ı mezbûrân Abdullah Efendi b. Mehmed ve Osman Çelebi b. Mustafa nâm kimesneler şehâdetleri ile şer‘an sâbite olan mezbûre Ayşe’nin zevc-i dâhili Mehmed Efendi b. Mehmed nâm kimesne meclis-i şer‘-i şerîfde bâ‘is-i hâze’l-kitâb el-Hâc Hüseyin b. Nasûh nâm kimesne mahzarında bi’l-vekâle ikrâr ve takrîr-i kelâm edip zevcem mezbûr Ayşe’nin mezbûr el-Hâc Hüseyin zimmetinde cihet-i karz-ı şer‘îden iki yüz esedî guruş hakkı olup bundan akdem mezbûr el-Hâc Hüseyin’den meblağ-ı mezbûru zevcem mezbûre Ayşe taleb ve da‘vâ ettiğinde ol dahi inkâr [edip] beynlerinde nizâ‘-ı küllî vukū‘undan sonra müvekkilem mezbûre Ayşe ile seksen esedî guruş üzerine inşâ-i akd-i sulh ettiklerinde ol dahi sulh-ı mezbûru kabûl ve bedel-i sulh olan meblağ-ı mezbûr seksen esedî guruş mezbûr el-Hâc Hüseyin yedinden tamâmen ahz u kabz ettiğinden sonra husûs-ı mezbûre müte‘allik da‘vâdan mezbûr el-Hâc Hüseyin’in zimmetini ibrâ-i âm ile kātı‘ü’n-nizâ‘la ibrâ ve iskāt edip ve mezbûr el-Hâc Hüseyin dahi bedel-i sulh olan meblağ-ı mezbûra müte‘allik cemî‘ da‘vâdan benim zimmetimi ve müvekkilem mezbûre Ayşe’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu Fi’l-yevmi-[197a] ’s-sâbi‘ min Cemâziyelevvel li sene seb‘a ve semânîn ve elf. Şuhûdü’l-hâl: Ebûbekir Çelebi b. Hüseyin el-Muhzır, İbrahim Çelebi b. Mehmed el-Muhzır, Abdullah Efendi [b.] Mehmed, Osman Çelebi b. Mustafa.