İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 616 Hüküm no: 680 Orijinal metin no: [197a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Hasan’ın Yusuf b. İbrahim’den boşandığı Mahmiye-i İstanbul’da sekbanbaşı İbrahim Ağa mahallesi sâkinelerinden Rukiye bt. Hasan nâm hâtun meclis-i şer‘-i hatîr-i lâzımü’t-teşrîfde, zevc-i dâhili bâ‘is-i hâze’l-kitâb Yusuf b. İbrahim nâm kimesne mahzarında ikrâr ve takrîr-i kelâm edip zevcim mezbûr Yusuf târih-i kitâbdan dört ay mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan beş yüz akçe mehr-i müeccelimin iki yüz akçesini yedinden ahz u kabz edip bâkī üç yüz akçe mehr-i müeccelim ve nafaka-i iddet-i ma‘lûme üzerlerine ve me’ûnet-i süknâm dahi kendi üzerime olmak üzre mezbûr Yusuf ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete müte‘allik âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cemâziyelevvel li sene seb‘a ve semânîn ve elf. Şuhûdü’l-hâl: Mustafa Çavuş b. Ramazan el-Mübâşir, Musa b. Cafer, es-Seyyid Receb Çelebi b. es-Seyyid ( ), Receb Çelebi b. ( ), Mehmed Çelebi b. Abdullah, İbrahim Çelebi b. Ahmed, Hüseyin b. Mustafa ve gayruhüm.