İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 616 Hüküm no: 681 Orijinal metin no: [197a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Ali’nin katledilen İbrahim Paşa kethüdâsı Mustafa Ağa b. Hasan’ın vârisleri aleyhine açtığı alacak davasında iddiasını ispat edemediği Havâss-ı Aliyye kazâsına tâbi‘ kasaba-i Hasköy’de Kızıl Mescid mahallesi sâkinelerinden Meryem bt. Ali nâm hâtun meclis-i şer‘-i şerîfde mahmiye-i İstanbul’da sâbıkan kāimmakām olan düstûr-ı mükerrem İbrahim Paşa’nın kethüdâsı olup maktûlen vefât eden Mustafa Ağa b. Hasan’ın evlâd-ı sıgārı Mehmed ve Ayşe ve Fâtıma’nın tesviye-i umûrlarına kıbel-i şer‘den mansûb vasîleri olup ve sulbiye kebîre kızı Hatice ve zevcesi Sâliha bt. Abdullah nâm hâtunlar taraflarından husûs-ı âti’l-beyâna vekîl olduğu yedinde olan mazmûnu müsbit hüccet-i şer‘iyye ile sâbite olup müteveffâ-yı mezbûrun tereke-i vâfiyesine vâzı‘ü’l-yed olan Şâhin Bey b. Abdullah nâm kimesne mahzarında üzerine da‘vâ ve takrîr-i kelâm edip bundan akdem Eflak voyvodası olan Aleksandra zimmetinde hakkım olan iki yük elli bin akçeyi tahsîl edivereyim deyû bi gayri hakkın yetmiş esedî guruşumu müteveffâ-yı mezbûr Mustafa Ağa hayâtında yedimden ahz u kabz edip kable’l-edâ fevt olmağla hâlâ mezbûr Şâhin Bey’e suâl olunup meblağ-ı mezbûru müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘iye-i mezbûreden müdde‘âsını mübeyyine beyyine taleb olundukda isbât-ı beyyineden izhâr-ı acz edip istihlâf etmeğin müteveffâ-yı mezbûrun verese-i kibârından olan mezbûretân Hatice’yi tahlîf için savb-ı şer‘-i şerîfden irsâl olunan Mevlânâ Abdullah Efendi b. Veli mezbûre Sâliha’nın Molla Fenârî mahallesinde sâkine olduğu menziline varıp ve mezbûre Hatice’nin Hoca Üveys mahallesinde sâkine olduğu menziline varıp [197b] zeyl-i sahîfede mastûrü’l-esâmî olan müslimîn huzûrunda akd-i meclis-i şer‘-i mübîn edip mezbûretân Sâliha ve Hatice’nin zâtları ma‘rifet-i şer‘iyye ile ârifân İvaz Efendi b. Mehmed ve Halil Çelebi b. Mustafa nâm kimesneler ma‘rifetleri ile mu‘arrefe olduklarından sonra müdde‘iye-i mezbûre yedinden ber vech-i muharrer ahz u kabz ettiğini bilmediklerine mezbûretân Sâliha ve Hatice’den her birine yemîn teklîf eyledikde anlardan her biri dahi alâ vefki’l-mes’ûl yemîn billâhi’l-aliyyi’l-a‘lâ ettiğini Mevlânâ-yı mezbûr mahallinde tahrîr ve ma‘an irsâl olunan Durmuş ile meclis-i şer‘a gelip alâ vukū‘ihi inhâ ve takrîr etmeğin mûcebince müdde‘iye-i mezbûre bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fî selhi şehri Rebî‘ilâhir li sene seb‘a ve semânîn ve elf. Şuhûdü’l-hâl: Hasan Efendi el-İmâm, Hasan Çelebi b. Hüseyin, Ömer Bey b. Abdülmennân, Mustafa Çelebi b. Yusuf, Hâfız b. Kasım, Ali Efendi b. ( ), İbrahim Çelebi b. İsmail, Şaban Efendi b. Ali, Cafer Çelebi b. Abdullah, Hasan Çavuş b. Ahmed ve gayruhüm.