İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 617 Hüküm no: 682 Orijinal metin no: [197b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid İbrahim Efendi’nin Harâccı Muhyiddin Mescidi Vakfı’na olan borcunun kefili oğlu Seyyid Mehmed tarafından ödenmesi gerektiği Merhûm Yahşîzâde Abdülkādir Efendi nâm sâhibü’l-hayrın mahmiye-i İstanbul’da Harâccı Muhyiddin mahallesinde vâki‘ mescid-i şerîfinde eczâ-i şerîfe tilâveti için mevkūfe nukūda bi’l-fi‘l mütevellî olan a‘lemü’l-ulemâ’i’l-izâm bâ‘is-i hâze’l-kitâb Mehmed Efendi b. el-merhûm ( ) Ağa’nın kethüdâsı ve tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre şer‘an sâbite olan fahrü’l-emâsil ve’l-eşbâh Ahmed b. Mahmud nâm kimesne meclis-i şer‘-i şerîfde sâbıkan Halomiç kadısı iken fevt olan es-Seyyid İbrahim Efendi’nin sulbî oğlu eş-Şeyh es-Seyyid Mehmed Efendi b. ( ) mahzarında üzerine da‘vâ ve takrîr-i kelâm edip müteveffâ-yı mezbûr es-Seyyid İbrahim Efendi’nin hayâtında zimmetinde cihet-i deyn-i şer‘îden üç yüz esedî guruş olmağla meblağ-ı mezbûr mezbûr eş-Şeyh es-Seyyid Mehmed Efendi’nin tarafeynden emir ve kabûlü hâviyeye kefâlet ile kefîl olduğundan sonra meblağ-ı mezbûru merkūm es-Seyyid İbrahim kable’l-edâ fevt olmağla merkūm eş-Şeyh es-Seyyid Mehmed Efendi meblağ-ı mezbûr altı yüz guruşun beş yüz elli iki buçuk guruşu babası müteveffâ-yı mezbûrun terekesinden bi’d-defe‘ât bana edâ ve teslîm ben dahi bi’l-vekâle ahz u kabz edip kırk yedi buçuk guruşu bâkī kalmışdı hâlâ merkūm eş-Şeyh es-Seyyid Mehmed Efendi’ye suâl olunup meblağ-ı bâkī-i mezbûru kefâletine binâen bana edâ ve teslîme tenbîh olunmak matlûbumdur dedikde gıbbe’s-suâl merkūm eş-Şeyh es-Seyyid Mehmed Efendi vech-i minvâl-i muharrer üzre olduğunu ikrâr ve i‘tirâf etmeğin mûcebince meblağ-ı bâkī-i mezbûr kırk yedi buçuk guruşu müdde‘î-i mezbûr Ahmed Ağa’ya kefâletine binâen edâ ve teslîme merkūm eş-Şeyh es-Seyyid Mehmed Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene seb‘a ve semânîn ve elf. Şuhûdü’l-hâl: Ali Çelebi b. Mustafa, Süleyman Çelebi b. Hasan, İbrahim Çelebi b. Mehmed, Osman b. Ömer, Ebûbekir b. Hüseyin ve gayruhüm mine’l-hâzırîn.