İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 619 Hüküm no: 684 Orijinal metin no: [198a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hızır’ın Yenikapı’daki evini Yusuf Ağa b. Süleyman’a sattığı Vilâyet-i Anadolu’da medîne-i Ayntab mahallâtından Köroğlu mahallesi ahâlîsinden olup mahmiye-i İstanbul’da Yenikapı dâhilinde Karaağaç mahallesinde müsafiren sâkin olan Mehmed Ağa b. Hızır nâm kimesne meclis-i şer‘-i şerîfde bâ‘is-i hâze’l-kitâb Yusuf Ağa b. Süleyman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrda vâki‘ bir tarafdan Ebûbekir Çelebi mülkü ve iki tarafdan kuyumcu Mehmed mülkü ve bir tarafdan tarîk-i âm ile mahdûd, dâhiliyyesinde tahtânî iki bâb oda ve iki mahzen ve bir matbah ve bir kenîf ve bir su kuyusu ve hâriciyyesinde bir bâb oda ve bir ahırı müştemil menzilimi, cümle tevâbi‘ ve levâhıkı ve kâffe-i hukūk ve merâfıkı ile mezbûr Yusuf Ağa tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î ile yüz esedî guruşa bey‘ ol dahi iştirâ ve kabûl ettiğinden sonra semeni olan meblağ-ı mezbûr yüz esedî guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezkûru mahallinde zabt ve tasarrufa mezbûr Yusuf Ağa’yı taslît eyledim, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşere min Saferi’l-hayr li sene seb‘a ve semânîn ve elf. Şuhûdü’l-hâl: El-Hâc İsmail b. Hüseyin, el-Hâc Süleyman b. Hüseyin, Şeyhzâde Mehmed Çelebi, el-Hâc Yakub b. Mustafa.