İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 54 Hüküm no: 4 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy’de oturan Yako v. Yuna’nın ölümü üzerine Yedikule debbağlarındaki alacaklarını varislerinin alması Medîne-i Beşiktaş’a tâbi‘ Ortaköy’de sâkin iken bundan akdem hâlik olan Yako v. Yuna Yahudi’nin evlâd-ı sıgārının vasîleri olan Arslan v. Harun nâm Yahudi meclis-i şer‘-i şerîf-i enverde kendi tarafından asîl ve Yedikule debbâğlarından ashâb-ı hâzihi’l-vesîka Tatar Ahmed ve el-Hâc İbrahim Dede ve Süleyman Dede ve Yüzbaşı Hüseyin ve Pilavcı Mehmed ve Durmuş ve Kanber Alioğlu ve Kulu Ahmed ve el-Hâc Rinoğlu ve Küçük Mehmed ve Sefer Çelebi ve Ahi Baba ve Hasan ve Bayram Halîfe ve müteveffâ Abdülcelil nâm kimesnenin oğlu ve terekesine [2a] vâzı‘ü’l-yed olan Osman ve Yusuf nâm kimesneler taraflarından husûs-ı âti’l-beyâna vekîl olduğu tâife-i merkūmeden Mustafa Çelebi b. el-Hâc Mehmed ve Abdullah Çelebi b. Ahmed nâm kimesneler şehâdetleriyle sâbit olan el-Hâc İbrahim Abdülfettah mahzarında bi’l-vesâye üzerine da‘vâ ve takrîr-i kelâm edip hâlik-i mezbûrun mezbûr el-Hâc İbrahim zimmetinde cihet-i deyn-i şer‘îden ba‘de külli hesâb altmış guruş ve müvekkilûn-ı merkūmûn zimmetlerinde dahi cem‘an yedi yüz yetmiş guruş ki min haysü’l-mecmû‘ zikr olunan on altı nefer kimesneler zimmetlerinde işbu defter nâtık olduğu üzere sekiz yüz otuz guruş dahi olup kable’l-ahz hâlik olmağla suâl olunup meblağ-ı mezbûru edâ etmek üzere mezbûrlara kıbel-i şer‘den tenbîh olunmağın bi’l-vesâye matlûbumdur dedikde gıbbe’s-suâl vekîl-i mezbûr cevâbında kaziyye vech-i meşrûh üzere olup lâkin hâlik-i mezbûr hayâtında benden ve müvekkilûn-ı mezbûrûndan işbu defter nâtık olduğu üzere meblağ-ı mezbûr cem‘an sekiz yüz otuz guruşu hayâtında ahz u kabz edip hatta ikrâr dahi etmişdi deyü def‘le mukābele edicek, isre’l-istintâk ve’l-inkâr mezbûr el-Hâc İbrahim’in def‘-i mezkûrunu mübeyyin beyyine taleb olundukda udûl-ı müslimînden mezbûrân Mustafa Çelebi ve Abd[ullah] Çelebi li-ecli’ş-şehâde meclis-i şer‘e hâzırân olup isre’l-istişhâd ve fi’l-hakīka hâlik-i merkūm Yako v. Yuna bundan akdem hayâtında bâlâda esâmîleri mastûr olan on altı nefer kimesnelerden ba‘de külli hesâb defter-i mezkûr nâtık olduğu üzere vekîl-i mezbûrun ve müvekkilûn-ı mezbûrûnun zimmetlerinde hakkım olan cem‘an sekiz yüz otuz guruşu mezbûrlardan bi’t-tamâm ahz u kabz eyledim deyü bizim huzûrumuzda ikrâr ve bizi işhâd eyledi, biz bu husûsu bu vecih üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri [makbûle] olmağın mûcebiyle müdde‘î-i mezbûr bî-vech mu‘ârazadan men‘ olunup mâ-vaka‘a bi’t-taleb ketb olundu. Fî evâili Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: El-Hâc Abdurrahman b. Mehmed, Mustafa b. Mehmed, Mehmed Efendi b. Musa, el-Hâc Ahmed b. ( ), el-Hâc Süleyman Çukadâr.