İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 58 Hüküm no: 10 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Efendi b. el-Hac Halil’in nükud vakfı mütevellisi Mustafa Çelebi b. İbrahim’in vefat eden eski mütevelli Mehmed Çelebi b. el-Hac Halil’deki vakfın alacağını terekesinden alması Mahmiye-i İstanbul’da Çerağî Hamza mahallesinde sâkin ve merhûm Abdurrahman Efendi b. el-Hâc Halil nâm sâhibü’l-hayrın eczâ-i şerîfe tilâveti için vakf eylediği nukūd[a] hâlâ mütevellî olan Mustafa Çelebi b. İbrahim meclis-i şer‘-i şerîf-i enverde vakf-ı mezbûra mütevellî iken fevt olan Mehmed Çelebi b. el-Hâc Halil b. İvaz’ın evlâd-ı sıgārı İbrahim ve Fâtıma ve Âişe ve Ümmühânî’nin vâlideleri ve tesviye-i umûrlarına kıbel-i şer‘den mansûbe vasîleri olmağla tereke-i müteveffâ-yı mezbûra vâzı‘atü’l-yed olan Gülbuy bt. Abdullah nâm hatun mahzarında bi’t-tevliyet ikrâr-ı tâm ve takrîr-i kelâm edüp müteveffâ-yı mezbûr Mehmed Çelebi hâl-i hayâtında vakf-ı mezbûra mütevellî iken mâl-ı vakf-ı mezbûrdan yirmi bir bin altı yüz akçe kendi mesârifine sarfla istihlâk edip hatta ber-vech-i muharrer mâl-ı vakf-ı mezbûrdan ol mikdâr akçeyi kendi mesârifine sarfla istihlâk edip vakf-ı mezbûra zimmetinde edâsı lâzıme-i deyni idiğini alâ re’si’l-işhâd ikrâr u i‘tirâf dahi eyledikden sonra meblağ-ı mezbûru kable’l-edâ zimmetinde iken mezbûr Mehmed Çelebi fevt olmağla meblağ-ı mezbûru terekesinden merkūme Gülbuy’dan huzûr-ı hâkimde da‘vâ ve müdde‘âmı şuhûd-ı udûlla muvâcehesinde şer‘an isbât edip meblağ-ı mezbûru tereke-i müteveffâ-yı mezbûrdan vakf-ı merkūm için bana edâya mezbûre Gülbuy’a yedimde olan işbu hüccet-i şer‘iyye nâtık olduğu üzere şer‘an tenbîh olunmuşdu. El-hâletü hâzihî meblağ-ı merkūm yirmi bir bin altı yüz akçeyi mezbûre Gülbuy tereke-i müteveffâ-yı mezbûrdan vakıf için bana edâ ve teslîm ben dahi yedinden bi’t-tevliye ahz u kabz ve tesellüm eyledim, min ba‘d meblağ-ı mezbûrdan bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mehmed Çavuş b. ( ), İbrahim Çelebi b. Ahmed, Ali b. Bâli, Receb b. Osman.